Aksioni i Policisë: Shoqërohen në Polici U.D. drejtorja dhe dy zyrtare të tjera të ARBK-së

Tri zyrtare të Agjencisë për Regjistrimin e Bizneseve, përfshirë ushtruesen e detyrës së drejtores, janë shoqëruar në Polici, ndërsa aksioni në ARBK po vazhdon.

Siç raporothet U.D. drejtorja e ARBK-së, Igballe Rexha Jashari, U. D Drejtore e ARBK, zyrtarja për procesimin e të dhënave, Albin Isufi dhe aprovuesja e lëndëve në këtë agjenci, Florije Lecaj janë shoqëruar në polici.

Aksioni që nisi që në orët e hershme të mëngjesit po zhvillohet me urdhër të Gjykatës Themelore të Prishtinës, për keqpërdorim të pozitës apo autoritetit zyrtar dhe “rastet e posaçme të falsifikimit të dokumenteve”, raporton Express.

Prokuroria Themelore e Prishtinës tha se “gjatë këtij aksioni janë kryer bastisje në Agjencinë e Regjistrimin e Bizneseve (ARBK), institucion që funksionon në kuadër të Ministrisë së Industrisë, Ndërmarrësisë dhe Tregtisë”.

“Aksioni është ende në zhvillim e sipër, ndërsa Prokuroria Themelore në Prishtinë është duke ndërmarrë të gjitha veprimet e nevojshme ligjore në funksion të zbardhjes së plotë të rastit”, tha Prokuroria më herët në një komunikatë për media.