Aksident mes dy veturave me targa të Kosovës në Maqedoninë e Veriut, disa të lënduar rëndë

Një aksident i rëndë trafiku ka ndodhur në orët e para të mëngjesit të së premtes në rrugën magjistrale Shkup – Pikëkalimi Kufitar Bllacë e Poshtme, ku janë përfshirë dy vetura me targa të Kosovës.

Sipas njoftimit të Ministrisë së Punëve të Brendshme të Maqedonisë së Veriut, në aksident janë përfshirë një veturë Kia, e drejtuar nga K.C. (33) nga Kosova, dhe një Volkswagen Golf, që drejtohej nga S.J. (61), po ashtu nga Kosova.

Si pasojë e përplasjes, lëndime të rënda trupore kanë pësuar të dy shoferët, si dhe dy pasagjere të veturës Volkswagen Golf, S.J. (54) dhe E.J. (20). Ndërkaq, lëndime trupore kanë marrë edhe dy pasagjerë të tjerë të Golfit, B.H. (23) dhe B.I. (35), të gjithë shtetas të Kosovës.

Të lënduarit janë dërguar për trajtim në Spitalin e Përgjithshëm “8 Shtatori” dhe në Qendrën e Urgjencës pranë kompleksit të klinikave “Nënë Tereza” në Shkup.

Autoritetet maqedonase kanë bërë të ditur se, me urdhër të prokurorit publik, shoferi i veturës Kia, K.C., do të privohet nga liria sapo të dalë nga spitali.

Një ekip hetimor i SPB Shkup ka kryer këqyrjen e vendit të ngjarjes, ndërsa hetimet për zbardhjen e plotë të rrethanave të aksidentit janë në vazhdim.