AGK-ja kërkesë Costas: Në takim me Kurtin të diskutohet çështja e lirisë së medias

Asociacioni i Gazetarëve të Kosovës i ka drejtuar letër publike presidentit të Këshillit Evropian, Antonio Costa, para vizitës së tij në Kosovë të mërkurën.

Në letrën e publikuar sot, AGK i ka kërkuar Costës që të hapë në takim me Kurtin çështjen e respektimit të lirisë së medias dhe të shprehjes nga ana e qeverisë.

“AGK-ja kërkon nga zoti Costa që, në takimin me kryeministrin në detyrë, Albin Kurti, të diskutojë nevojën për respektimin e lirisë së medias dhe të shprehjes nga ana e Qeverisë dhe institucioneve të Kosovës”, thuhet në letrën e AGK-së.

“Kosova ka shënuar një rënie dramatike të lirisë së medias në vitet e fundit, e dokumentuar nga raporte ndërkombëtare, duke përfshirë edhe vizitën në mars të Platformës për Sigurinë e Gazetarëve të Këshillit të Evropës”, vazhdon letra e Asociacionit të Gazetarëve.

Sipas letrës drejtuar Costës, AGK është shprehur se qeveria e zotit Kurti dhe partia e tij politike, Vetëvendosje, “janë angazhuar në fushata të vazhdueshme denigrimi kundër gazetarëve dhe punonjësve të mediave për shkak të punës së tyre. Kjo e ka bërë klimën e të bërit gazetari në Kosovë më të rëndën në vitet e fundit.”

“Institucione që do të duhej të ishin të pavarura, si Komisioni i Pavarur i Mediave dhe Radio Televizioni i Kosovës, janë vënë nën ndikim të drejtpërdrejtë politik nga Qeveria, nëpërmjet emërimit të bordeve në procese të komprometuara”, ka thënë AGK.

Presidenti i Këshillit Evropian, Antonio Costa po zhvillon një tur diplomatik në gjashtë vendet e Ballkanit Perëndimor në prag të Samitit BE–Ballkani Perëndimor, ku do të takohet me liderët rajonalë dhe do të bashkëkryesojë takimin e nivelit të lartë më 5 qershor në Tivat të Malit të Zi.

Costa, sot ndodhet në Tiranë.

Pas përfundimit të vizitës atje, presidenti i KE-së do të vizitojë Prishtinën të mërkurën.