Abdixhiku: Nga nesër merremi me zgjedhjet nacionale, priten në fund të dhjetorit

Të drejtën e votës e ka ushtruar sot edhe kryetari i Lidhjes Demokratike të Kosovës (LDK), Lumir Abdixhiku, i cili së bashku me bashkëshorten e tij u drejtua drejt kutisë së votimit në Shkollën Fillore “Faik Konica” në Prishtinë.

Abdixhiku, ka deklaruar se nga nesër fokusi i partisë do të jetë tek zgjedhjet nacionale, duke shtuar se pritjet janë që në fund të dhjetorit të ketë sërish proces zgjedhor.

“Menjëherë nga dita e nesërme do të kthejmë fokusin te zgjedhjet nacionale. Pritjet tashmë janë se në fund të dhjetorit do të kemi festën e ardhshme zgjedhore dhe vendimmarrjen demokratike në Republikën e Kosovës”, deklaroi Abdixhiku për media, pas votimit.

Ai poashtu u shpreh i bindur se procesi i sotëm zgjedhor i balotazhit do të shkojë mirë e mbarë.

“Ditë e mirë, mëngjes i mirë. Shpresojmë të jetë një proces i mbarë e i mirë, siç ka ditur gjithmonë qytetari të sillet në procese zgjedhore. Jam i lumtur për nivelin demokratik që gjithherë e tregojmë në procese zgjedhore. Më besoni se në standardet e Ballkanit Perëndimor, besa edhe në Evropë, mënyra si i organizojmë zgjedhjet, si i pranojmë rezultatet, e si e trajtojmë procesin zgjedhor është një mrekulli demokratike për të cilën të gjithë qytetarët e Kosovës duhet të jenë krenarë”, shtoi ai.