120 euro u ble një votë në zgjedhjet lokale, Prokuroria në Prizren ngre aktakuzë ndaj dy personave

Prokuroria Themelore në Prizren ka ngritur aktakuzë ndaj dy të pandehurve, Y. Rr. dhe B. K., të cilët dyshohet se kanë kryer veprën penale “dhënia ose marrja e ryshfetit në lidhje me votimin”.

Sipas aktakuzës, më 12 tetor, në fshatin Budakovë, Y. Rr. dyshohet se i ka ofruar 120 euro B. K.-së, me qëllim që ky i fundit të votojë në favor të një kandidateje për asamble komunale. Për verifikimin e votës, Y. Rr. më pas ka kërkuar të shohë telefonin e B. K.-së, pas çka dyshohet t’i ketë dorëzuar shpërblimin.

Në anën tjetër, B. K. akuzohet se ka pranuar këtë shumë parash për të ndikuar në votimin e tij.

Prokurori i rastit, me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit të shpallen fajtorë dhe të dënohen sipas ligjit.