Nëse mendoni se trafiku është vetëm përshtypje, shifrat thonë të kundërtën.
Në Shqipëri janë të regjistruara mbi 1.05 milionë mjete, ndërsa për çdo 1 mijë banorë ka 361 autovetura. Thënë ndryshe një në tre shqiptarë ka makinë. Shifta që tregojnë jo vetëm rritjen e flotës së automjeteve, por edhe sfidat me trafikun dhe infrastrukturën.
Numri i mjeteve rrugore në Shqipëri është rritur me 9.3% brenda një viti, duke arritur në 1,048,092 mjete në fund të vitit 2025. Autoveturat zënë 80.8% të totalit, ndërsa treguesi i motorizimit është rritur nga 326 në 361 makina për 1 mijë banorë, duke treguar se ritmi i shtimit të automjeteve vijon të jetë i lartë.
Pesha më e madhe e automjeteve është e përqendruar në Tiranë, ku ndodhen 34.7% e mjeteve të vendit. Pas saj renditen Durrësi me 13.6% dhe Fieri me 9.1%. Megjithatë, rekordin e motorizimit e mban Durrësi, me 535 autovetura për çdo 1 mijë banorë, shumë mbi mesataren kombëtare.
Edhe pse flota po zgjerohet, ajo mbetet e dominuar nga makinat me naftë që përbëjnë rreth 70% të autoveturave. Ndërkohë automjetet elektrike po fitojnë terren me një rritje vjetore prej 91.2%, sinjal i një ndryshimi gradual të tregut.
Pjesa më e madhe e mjeteve që qarkullojnë në rrugë janë të vjetra. Autoveturat me moshë 11-20 vjet përbëjnë 45,7 % të autoveturave gjithsej. Mjetet e prodhuara gjatë periudhës 2000-2010 përbëjnë 55,3 % të totalit të mjeteve rrugore./TCh/
