Kryetari i FRLDK-së në Deçan publikon kërkesat që janë bërë në seancën e Kuvendit Komunal

Kryetari i Forumit të Rinisë së LDK-së së degës së Deçanit, Vatan Istrefaj ka publikuar sot kërkesat dhe propozimet që i bëri gjatë seancës së Kuvendit Komunal në Deçan, shkruan GazetaDemos.

Ai përmes një postimi në Facebook ka cekur se ky kuvend tashmë do të jetë edhe live, që qytetarët ta mund ta ndjekin çdo seancë.

Istrefaj tutje listoi edhe kërkesat dhe prpozimet e tjera që i tha gjatë seancës.

Postimi i plotë i tij:

Seanca e ditës së djeshme, filloj me transmetimin live të Kuvendit Komunal të Deçanit, ngjarje e cila po praktikohet për herë të parë dhe ndihem i lumtur që kjo kërkesë e imja u realizua, dhe qytetarët e Deçanit do i ndjekin të gjitha seancat, debatet dhe të gjitha vendimet që janë me interes për qytetin tonë.

Ndër pikat e rendit të ditës ishte edhe projektbuxheti i vitit 2024 – 2026. Në buxhetin e vitit paraprak ka qenë në projekt elektrifikimi për Bjeshkën e Strellcit por ky projekt është larguar nga kryetari duke i lajthitur qytetarët e atij lokaliteti dhe Kuvendin Komunal.

Pika e dytë ishte loti i III për ndërtimin dhe asfaltimin e rrugëve në fshatrat Strellc i Epërm, Strellc i Ulët, Lukë e Ulët etj…

Në vitin paraprak ka qenë i njëjti emërim por rruga ka mbetur ende pa asfaltuar në këtë lokalitet, dhe shpresojmë që të mos mbetet edhe kësaj radhe vetëm zotim i kryetarit.

Investimet për shëndetësinë primare për vitin 2024, me vetëm 25 mijë euro, tregon që Komuna nuk e ka prioritet shëndetësinë për banorët e Deçanit.

Poashtu, kërkesë e imja ishte që të shfrytëzohet vendimi i kryetarit dhe zbatimi i rregullores komunale me datë 31.07.2019 për caktimin e orarit të punës për subjekte afariste në Komunën e Deçanit. E diela ose ndonjë ditë tjetër të jetë ditë pushimi në Komunën tonë, kërkesë e qytetarëve dhe afaristëve të Komunës së Deçanit.

Kërkesa ime mori përkrahje me unanimitet nga Kuvendi Komunal dhe tani mbetet në dorë të kryetarit që t’a shfuqizojë vendimin dhe e diela të jetë ditë pushimi.