Kraja: Kadare mbështeti pa rezervë Kosovën në më shumë se 50 vitet e shkuara

Mehmet Kraja, kryetar i Akademisë së Shkencave dhe Arteve të Kosovës, ka publikuar një shkrim, të cilin e ka mbajtur në mbledhjen përkujtimore për Ismail Kadarenë, shkrimtar i shquar shqiptar që ndërroi jetë dy ditë më parë.

Në shkrimin e tij, Kraja ka rezervuar fjalët të mëdha për Kadarenë. Sipas Krajës, ikja e Kadaresë ka një kuptim specifik.

“Për ne në Kosovë ikja e Kadaresë ka një kuptim më specifik: ka qenë mbështetja këmbëngulëse, e fortë dhe pa rezervë që ai i ka bërë Kosovës në më shumë se 50 vitet e shkuara” – ka shkruar ai.

Tutje, Kraja ka theksuar ndihmën e Kadaresë rreth luftës së Kosovës.

“Zëri i Kadaresë në mbështetje të Kosovës ka krijuar kontekst politik ndërkombëtar, ka arritur të depërtojë nëpër kancelaritë e ftohta diplomatike dhe, që është po kaq me rëndësi, ka qenë frymëzim për shumë gjenerata intelektualësh, mësuesish, studentësh, nxënësish, pra për një mase të gjerë njerëzish në Kosovë, përfshirë edhe ata që, në aktin final të kësaj historie, u vunë në radhët e para të luftës për çlirimin e Kosovës. Në këtë pikë, Kadare ka bërë më shumë se të gjitha institucionet së bashku të shtetit shqiptar” – ka shkruar tutje kryeakademiku i Kosovës.