Komandanti amerikan premton vazhdimin e bashkëpunimit në fushën e mbrojtjes me Kosovën

Kështu ai është shprehur pas takimit me ministrin në detyrë të Mbrojtjes, Ejup Maqedonci, ku i pranishëm ishte edhe Stephen Osborn Agjutant i Përgjithshëm i Gardës Kombëtare të Ajova-s, gjeneral brigade.

“Gjeneral Wegscheider theksoi se partneriteti me ShBA do të jetë gjithnjë e më i fuqishëm dhe do të vazhdojë në shumë aspekte në fushën e mbrojtjes”, ka cituar Maqedonci gjeneralin amerikan.

Maqedonci në këtë takim ka thënë se përveç ushtrimit  “Defender Europe 25”, është diskutuar edhe për hapat që kanë marrë si ministri në implementimin e Plantit të Përgjithshëm të Tranzicionit të FSK-së.

“Gjatë takimit, krahas mirënjohjes që shpreha për faktin që kanë përzgjedhur pikërisht Kosovën për vendosjen e komandës së këtij divizioni, gjithashtu diskutuam dhe për pjesëmarrjen aktive të FSK -së në këtë ushtrim, e që është ushtrimi më i madh ushtarak në kontinentin e Evropës, pastaj diskutuam po ashtu rreth hapave të ndërmarr nga Ministria e Mbrojtjes dhe Forca e Sigurisë së Kosovës në implementimin e Planit të Përgjithshëm të Tranzicionit, ristrukturimit të Ministrisë së Mbrojtjes dhe FSK-së, në funksion të përmbushjes së objektivave strategjike me qëllim primar forcimin e ushtrisë sonë dhe sigurisë në vend”, ka thënë ai.