Ja se kur do të mbahet seanca e radhës e Kuvendit

28 tentativa – 28 dështime.

Edhe sot u shënua dështimi i radhës në Kuvendin e Kosovës, ku deputetët e zgjedhur nuk arritën ta konstituonin legjislaturën e nëntë.

Edhe seanca e sotme ishte si ajo e së enjtes, nis me vonesë, por përfundoi brennda tre minutave.

Por kësaj radhe ishte më i zbehtë në deklarime, pasi pas dështimit për konstituim të Kuvendit, ishin vetëm deputetja e betuar e PDK-së Vlora Çitaku dhe kandidatja e cila nuk po kalon për t’u bërë kryekuvendare, Albulena Haxhiu.

Çitaku tha se situata ‘absurde’ në Kuvendin e Kosovës fatkeqësisht po vazhdon.

“Fatkeqësisht situata absurde në Kuvendin e Kosovës po vazhdon. Kosova po mbetet pa institucion për shkak të kryeneçësisë së LVV, ne bëjmë thirrje për reflektim. Ne si PDK kemi ofruar zgjidhje, nuk është koha të barrikadohemi. Kosova është më e madhe se secila parti”, tha Çitaku.

Ndërsa Haxhiu fajin ia lë ish-opozitës për ngërçin politik.

“Në asnjërën prej këtyre seancave nuk e kemi parë as minimumin e vullnetit të opozitës për të kontribuuar në konstituimin e Kuvendit të Republikës së Kosovës”, deklaroi Haxhiu.

Kjo seancë, e mbajtur një ditë pas festës së Kurban Bajramit, ngjalli shpresat tek disa deputetë se situata do të ndryshojë, e partia në detyrë do të kishte reflektuar. Madje edhe myftiu Naim Tërnava gjatë ditë së djeshme me humor pati thënë se do të therte kurban për t’u konstituuar Kuvendi. Megjithëse, as kjo nuk kreu punë.

Seanca e 29-të do të zhvillohet të hënën e 9 qershorit në ora 11:00, megjithëse me deklarimet e deputetëve të betuar të partive politike, situata është e prirë të mos ndryshojë