“Kosova duhet ta implementojë Asociacionin e komunave me shumicë serbe vetëm bazuar në ndryshime e propozuara nga Gjykata Kushtetuese”. Kështu është deklaruar, ish- ambasadori i Holandës në Kosovë, Robert Bosch, pasi ai vlerëson se Serbia e ndihmuar nga i dërguari i posaçëm i Bashkimit Evropian për dialogun Kosovë-Serbi, Miroslav Lajçak, po e rrit presionin ndaj Kosovës për themelimin e Asociacionit.
“Me ndihmën e Lajçakut, Serbia po e rrit presionin ndaj Kosovës për të vazhduar para me themelimin e Asociacionit. Kosova duhet të jetë e fortë dhe ta implementojë Asociacionin bazuar në vendimin e Gjykatës kushtetuese. Është gjëja e duhur për të bërë në një shtet ku prioritet është sundimi i ligjit. Duhet t’u thuhet kjo gjithë shteteve miqësore”, ka shkruar Bosch në Facebook.
Përfaqësuesi i Lartë për Punë të Jashtme dhe Siguri i Bashkimit Evropian, Josep Borell, javë më parë, përmes një deklarate zyrtare kishte bërë të ditur se të gjitha marrëveshjet e arritura në procesin e dialogut Kosovë-Serbi nën ndërmjetësimin e BE-së “ që nga viti 2011 të mbesin valide dhe të detyrueshme”. /AlbanianPost/