Rritja e sigurisë publike – Inspektime në diskoteka dhe ambiente të frekuentuara në krejt Kosovën

Divizioni i Inspektimit në kuadër të Agjencisë së Menaxhimit Emergjent (AME) ka zhvilluar gjatë kësaj jave një sërë inspektimesh në diskoteka dhe ambiente të tjera me frekuentim të lartë në disa nga qytetet kryesore të Kosovës, për të garantuar respektimin e standardeve të sigurisë dhe mbrojtjes nga zjarri.

Inspektimet janë zhvilluar në Prishtinë, Suharekë, Pejë, Gjakovë dhe Ferizaj, duke pasur fokus të veçantë në vlerësimin e zbatimit të masave të mbrojtjes nga zjarri, sipas Ligjit për Mbrojtje nga Zjarri Nr. 08/L-261 dhe Ligjit për Fatkeqësi Natyrore dhe Fatkeqësi të Tjera Nr. 04/L-027.

Sipas AME-së, këto aktivitete janë pjesë e një fushate të qëndrueshme për të përmirësuar sigurinë në vendet publike, sidomos në ato që frekuentohen nga numër i madh qytetarësh, si diskotekat dhe ambientet e natës.

“Qëllimi ynë është të garantojmë sigurinë maksimale për qytetarët në çdo ambient publik, në përputhje me legjislacionin në fuqi”, thuhet në njoftimin zyrtar të Agjencisë.

AME thekson se kontrollet do të vazhdojnë në të gjitha regjionet e vendit, dhe do të pasohen me masa në rast të shkeljeve të rregulloreve për siguri, me qëllim krijimin e një mjedisi më të sigurt për të gjithë qytetarët.