Haxhiu: Opozita vazhdimisht ka kundërshtuar reformat në sistemin e drejtësisë, vetëm për të zvarritur proceset

Ministrja në detyrë e Drejtësisë, Albulena Haxhiu, ka akuzuar opozitën për pengimin e reformave në sistemin e drejtësisë.

Sipas saj, opozita ka dorëzuar komente në Gjykatën Kushtetuese kundër amendamenteve për procesin e vetingut, ka kontestuar dy herë reformën në Këshillin Prokurorial dhe po aq herë Ligjin për krijimin e Byrosë për konfiskimin dhe sekuestrimin e pasurisë së pajustifikuar.

“Për vite me radhë, opozita ka shprehur kundërshtime të vazhdueshme ndaj reformave të thella në sistemin e drejtësisë, duke përdorur instrumentet kushtetuese për t’i zvarritur ato. Ata kanë dorëzuar komente në Gjykatën Kushtetuese kundër amendamenteve kushtetuese për procesin e vetingut, kanë kontestuar dy herë radhazi reformën në Këshillin Prokurorial dhe kanë sfiduar po aq herë në Gjykatën Kushtetuese Ligjin për krijimin e Byrosë për konfiskimin dhe sekuestrimin e pasurisë së pajustifikuar”, shkruan Haxhiu.

Tutje ajo thotë se gjatë kohës kur VV-ja ishte në opozitë, ka kontestuar vetëm çështje të cilat i ka konsideruar të dëmshme, si Gjykata Speciale, marrëveshja për Asociacionin e komunave me shumicë serbe, Ligji për Amnistinë e kriminelëve serbë dhe demarkacioni me Malin e Zi.

Sipas Haxhiut, pavarësisht këtyre pengesave, reformat kanë avancuar. Procesi i vetingut ka marrë miratimin, reforma në Këshillin Prokurorial është zbatuar, ndërsa Byroja për konfiskimin e pasurisë është në fazën e fundit të shqyrtimit në Gjykatën Kushtetuese, me pritje që të miratohet.

“Në vend që të ofronte kontribut konstruktiv për përmirësimin e sistemit të drejtësisë, opozita ka zgjedhur një qasje obstruksioniste, me qëllim të zvarritjes së proceseve reformuese.
Po, edhe ne gjatë kohës sa ishim në opozitë kemi kontestuar çështje në Gjykatën Kushtetuese, por gjithnjë dhe vetëm ato që janë konsideruar të dëmshme si psh Gjykata Speciale, Zajednica, Ligji për Amnistimin e kriminelëve serb, Demarkacioni me Malin e Zi e të tjera si këto”, ka thënë Haxhiu.

“Megjithatë, pavarësisht këtyre pengesave, reformat kanë avancuar:

– Vetingu ka marrë dritën e gjelbër,
– Reforma në Këshillin Prokurorial u jetësua,
dhe
– Byroja për konfiskimin e pasurisë është në fazën përfundimtare të shqyrtimit nga Gjykata Kushtetuese, me pritje që të miratohet.
Pavarësisht vonesave dhe përpjekjeve për ta ndalur këtë proces, rruga drejt forcimit të shtetit të së drejtës është e pandalshme”, ka shkruar ajo në Facebook.