Hamiti i LDK-së: Albin Kurti ka rënë në grackën e Serbisë

Anëtari i Kryesisë së Lidhjes Demokratikë të Kosovës, Muhamet Hamiti, ka komentuar gjashtë kushtet e kryeministrit Albin Kurti për Asociacion.in

Sipas Hamitit, Qeveria Kurti rënë në grackën e Serbisë që sipas tij nuk ka qenë e interesuar të dialogoj.

“Këto kushte duhet t’i kishte vendosur në biseda me Serbinë, në kuadër të dialogut, i cili është pezulluar për një kohë, për fajin e madh të Serbisë, por edhe për faktin tjetër që kjo qeveri, ky kryeministër ka rënë në grackën e Serbisë, e cila ka qenë e interesuar të mos vazhdoj dialogu”, ka thënë Hamiti në RTV Dukagjini.

Ai tha se Asociacioni duhet të bëhet mbi bazë të vendimit të Gjykatës Kushtetuese të Kosovës, pra sipas tij, duke u zbatuar një Asociacion që nuk ka fuqi ekzekutive që nuk prek sistemin kushtetues.

“Ky ka qenë qëndrimi i LDK-së, dhe ky është qëndrimi i drejtë”, ka deklaruar ai.

Hamiti kritikon Kurtin duke besuar se me vite të tëra e “ka traumatizuar” shoqërinë e Kosovës dhe e ka polarizuar tej mase me fjalët që “Zajednica nuk kalon” e që në seancën plenare të së enjtes, në një mënyrë e ka thënë që Asociacioni kalon me kushte.

“Qeveria duhet t’i marrë parasysh pikat që duhet zbatuar kurdo që vendos të hartojë statusin e Asociacionit në përputhje me Kushtetutën dhe marrëveshjen e 2013-ës dhe për ta çuar përpara dialogun”, ka thënë ai.