“Guxo po bën hajgare se nuk e bën ministër”, Haxhi Avdyli i reagon gazetarit

Deputeti Haxhi Avdyli tha se nuk është duke tentuar që të zë pozitën e ministrit të Shëndetësisë pas dorëheqjes së Rifat Latifit. 

Ai këtë deklaratë e bëri në replikë me gazetarin Bujar Vitija, i cili tha se partia e tij po bën hajgare me të kur tha se Avdyli është propozimi i tyre për të parin e shëndetësisë. 

“Me t’u dhimt Haxhi Avdyli. Ky është tentimi i tij i tretë mu bo ministër. Partia e tij e din që s’bohet ama po e tallin. Po i thojnë kena me t’propozu. Mos boni hajgare me njeri”, ka shkruar Vitija më herët.

Avdyli reagoi duke thënë se është komod me pozitën e deputetit, derisa “përmendjet” se ai do të bëhet ministër i quajti si insistime të mediave e njerëzve të tjerë. 

“Asnjëherë nuk kam tentuar dhe askush nuk po bën hajgare. Më shumë janë përmendje e insistime të mediave e njerëzve dashamirë. I falënderoj të gjithë ata që kanë konsideratë që jam i denjë për atë pozitë. Por, i nderuar Bujar, unë jam komod në pozitën e deputetit dhe nga aty po mundohem të jap kontribut me aq sa po mundem e aq sa po di për shëndetësinë dhe proceset tjera. Respekte e mirupafshim”, ka shkruar Avdyli në koment. 

Derisa, gazetari Vitija tha se deklarata e bashkëkryetares së partisë Guxo, Donika Gërvalla, se Avdyli ishte kandidati i partisë së saj për ministër të Shëndetësisë iu duk e çuditshme për një arsye. 

“Mbrëmë kryetarja e Guxo tha se do ta propozojë emrin tënd për ministër. Me sa e di marrëveshja e koalicionit nuk ju mundëson të keni edhe një ministri në Qeveri. T’u e pasë parasysh këtë fakt nuk e kuptova deklaratën e Gërvalles”, tha Vitija.