Trajneri i M anchester City, Pep Guardiola ka hedhur pak dritë mbi dëmtimin e Erling Haaland përpara ndeshjes së skuadrës së tij në Champions League kundër skuadrës spanjolle Sevilla.
Haaland , i cili ka shënuar 17 gola në 11 paraqitje në Premier League për skuadrën e Mançesterit këtë sezon, u pa duke çaluar nëpër terrenin stërvitor të Cityt në fund të javës së kaluar, imazhe që shkaktuan shqetësim të madh për Pep dhe ekipin e tij.
Guardiola zbuloi se edhe pse sulmuesi po ndihet më mirë, ai ende nuk është 100% në formë. “Të krahasosh të shtunën dhe të dielën, madje edhe të hënën, çdo ditë ndihet më mirë. Por megjithatë, nuk është 100 për qind. Ne nuk duam të rrezikojmë, nuk ka kuptim. Shpresojmë se mund ta kemi atë kundër Fulhamit”, shpjegoi Pep në Konferenca për shtyp para ndeshjes në Champions League.
Pas ndeshjes së fundit të grupeve të Ligës së Kampionëve të kësaj jave, ‘Qytetarët’ udhëtojnë në Craven Cottage më 5 nëntor për t’u përballur me Fulhamin e Marco Silva.