Në seancën e së enjtes në Gjykatën Themelore në Prishtinë, në gjykimin për krime lufte ndaj Caslav Jolic, Naim Curraj gjatë dhënies së dëshmisë së tij deklaroi se i akuzuari me dy persona tjerë e kishin rrahur vëllanë e tij, në këtë rast të dëmtuarin, Nexhmedin Curraj.
Një deklarim të tillë dëshmitari Curraj e bëri duke u përgjigjur në pyetjet e prokurorit special, Ilir Morina, raporton “Betimi për Drejtësi”.
Ai tha se kishte dëgjuar se vëllanë e tij Nexhmedinin, i akuzuari Jolic me dy personat e tjerë e kishin rrahur pasi që e kishin akuzuar që e kishte dëmtuar një përmendore të serbeve.
Tutje, dëshmitari Curraj tha se të dëmtuarin Nexhmedin e kishin rrahur në qendër të qytetit sa ishte duke punuar taksist, por që ai e as babai tij nuk e kishin parë momentin kritik, pasi që nuk kishin pasur mundësi të afroheshin edhe pse e kishin ditur çfarë kishte ndodhur.
Sipas tij, aty e kishin rrahur edhe të dëmtuarin Naim Feratin.
Curraj më tej tha se nëse nuk kishte qenë atë kohë një person i quajtur Ves Krasjiq, i cili sipas tij kishte qenë polic serb.
“Nexhmedini ka qenë në gjendje të mjerueshme, fulçinë e dhëmbët i ka pas t’thyem”, tha dëshmitari Curraj.
I njëjti tha se menjëherë pas kësaj ngjarje të dëmtuarin Nexhmedinin e kishin dërguar në Vrellë të Istogut për ta strehuar tek familja e gruas së tij, duke shtuar që ai se kishte parë atë për disa kohë dhe se nuk e dinte se si ishte shëruar ai.
Po ashtu dëshmitari Curraj deklaroi se nuk e kishte parë të akuzuarin Jolic dhe dy personat e tjerë, Llaza dhe Rada duke ia rrahur vëllanë, por se këtë ia kishin thënë Naim Ferati edhe Zef Malesija.
Tutje, ai tha se edhe një person i quajtur Zoran kishte ndenjur me të akuzuarin Jolic por që nuk e dinte se çfarë lidhje farefisnore kishin, por që sipas tij i njëjti ishte sjell keq.
Dëshmitari Curraj u ballafaqua nga trupi gjykues nëse mund të identifikonte të akuzuarin Jolic dhe personin e quajtur Zoran.
“Ja ja s’muj e vërtetoj se atëherë ka ken ma ndryshe, ja s’muj me than se s’jom i sigurt, nuk jom i sigurt a kshtu me pa direkt nashta..”, tha dëshmitari Curraj.
Ndryshe, i akuzuari Jolic ishte deklaruar i pafajshëm në seancën e 14 dhjetorit 2022.
Prokuroria Speciale e Republikës së Kosovës (PSRK) më 18 nëntor 2022, ka ngritur aktakuzë ndaj të pandehurit Caslav Jolic me arsyetimin se gjatë kohës së luftës në Kosovës në bashkëkryerje me persona të tjerë, duke i shkelur rregullat e së drejtës ndërkombëtare, ka aplikuar masat e torturimit dhe shkaktimit të vuajtjeve të mëdha apo cenimit të integritetit trupor ose shëndetit kundër popullsisë civile që nuk kanë marrë pjesë drejtpërdrejt në konflikt për shkaqe që lidhen me luftën.