Ambasadori i Serbisë në Shtetet e Bashkuara të Amerikës, Marko Gjuriq ka thënë se Kosova dhe Serbia kanë arritur marrëveshje të mërkurën, sa i përket lirimit të Dejan Pantiq dhe largimit të barrikadave në veri të vendit.
Gjuriq për televizionin publik serb ka thënë se me arritjen e marrëveshjes, kanë bërë një hap më tej në mbrojtjen e serbëve në veri të Kosovës, derisa sipas tij, Kosova ka humbur një mundësi nga Amerika për sjelljen e saj.
“Ftoj qytetarët e Serbisë që të njihen me dy elementët e tjerë të bisedimeve që u zhvilluan dhe marrëveshjes që u arrit, e cila u materializua përmes deklaratës së përbashkët të BE-së dhe SHBA-së nga njëra anë dhe deklaratës së KFOR-it nga ana tjetër”, thotë Gjuriq.
Gjuriq ndër të tjera ka thënë se kanë fituar garanci nga KFOR-i dhe NATO-ja, që Forca e Sigurisë së Kosovës të konsultohet me komunitetin serb, para se të vendoset në veri të vendit.
“Kjo do të thotë që nga dje për herë të parë kemi garanci ndërkombëtare nga KFOR-i dhe NATO-ja që vlejnë për të gjithë që kanë të bëjnë me dërgimin e forcave të sigurisë së Kosovës në veri, me obligim që të konsultohen me komunitetin serb”, ka thënë Gjuriq.
Gjuriq: Me marrëveshjen e arritur dje, shkuam një hap më tej në mbrojtjen e serbëve në Kosovë
![Gjuriq: Me marrëveshjen e arritur dje, shkuam një hap më tej në mbrojtjen e serbëve në Kosovë](https://gazetademos.com/wp-content/uploads/2021/06/gjuriq-600x360-1.jpg)