Në prag të përvjetorit të 10-të, Armina Mevlani dhe Shkëlzen Berisha do të hyjnë në një kapitull të ri të jetës së tyre, tashmë si burrë dhe grua.
Dy javë më parë, Armina zbuloi se do të martohej në fund të shtatorit. Ata kurorëzojnë lidhjen e tyre në martesë ditën e sotme (e diel, 25 shtator) në një ceremoni që do të mbahet në një agroturizëm në Shijak.
Anabel mëson se festa do të nisë pasdite me koktej dhe më pas do të jetë darka. Çifti është kujdesur për të gjitha detajet, përfshirë dekorin dhe menunë e dasmës, e cila do të jetë tradicionale shqiptare së bashku me pijet që janë prodhim i vendit tonë.
Në dasmë, përpos personazheve nga bota e artit, kulturës dhe televizionit, nuk do të mungojnë as figura të politikës.
Në një postim në Instagram, ajo ka publikuar një detaj nga fustani, ku shkruhet “Love is the answer” (dashuria është përgjigjja).
Çfarë fustanesh do të veshë Armina? Në “Goca dhe gra”, pa hyrë në shumë detaje, ajo tha se “një prej fustaneve është bërë enkas për të, nga një prej stilisteve të saj të preferuara, Viviene Westwood”. Të tjerët janë krijim të një stilisti shqiptar.
Armina dhe Shkëlzeni u martuan në tetor të vitit 2018, në një ceremoni intime. Ai i propozoi për martesë kohë më parë në liqenin e Como-s, Itali.
Gjatë këtyre viteve, ata janë përpjekur ta mbajnë lidhjen jashtë vëmendjes mediatike, megjithatë nuk kanë munguar deklaratat e dashurisë apo intervistat për marrëdhënien e tyre. Armina ka folur edhe për fëmijët e Shkëlzenit nga martesa e mëparshme, Medina dhe Lajdon.
“Unë jam e lumtur që Zeni ka dy fëmijë me të cilët unë shkoj shumë mirë dhe i dua jashtë mase. Jam gjithashtu e lumtur të dijë që fëmija im s’do të jetë si unë, por do të ketë shumë motra dhe vëllezër. Më pëlqen familja e madhe. Arsyeja e vetme pse s’kam bërë fëmijë është se s’jam ndjerë gati, por edhe Zeni s’më ka bërë presion dhe pse e dëshiron shumë,” tha ajo në gusht të vitit 2019 në një intervistë për “Pushime on top”.
“Që në momentin e parë që e kam parë, jam tërhequr pa e ditur fare kush ishte… më pas me kalimin e kohës tek ai gjeta shumë gjëra. Ndajmë të njëjtat këndvështrime për jetën, na pëlqejnë të njëjtat rutina, jemi romantikë, ëndërrimtarë, nëse na lë bashkë kemi gjithmonë diçka për të folur dhe koha kalon shumë shpejt. Plotësojmë njëri-tjetrin gjithmonë. Tek ai kam gjetur një partner në çdo gjë,” është shprehur Armina në Instagram.