Dëmet nga zjarret në Shqipëri, Qeveria do të ofrojë paketë mbështetëse në fushën e bujqësisë dhe banesave

Kryeministri i Shqipërisë, Edi Rama ka njoftuar të enjten se qeveria do të ofrojë një paketë mbështetëse për sektorin e bujqësisë, banesat dhe dëmet e tjera të shkaktuara nga zjarret masive që kanë përfshirë vendin gjatë korrikut.

Sipas tij, për muajin gusht do të rritet gatishmëria dhe do të mobilizohen të gjitha strukturat për menaxhimin e situatës.

“Masat e marra, rritja e gatishmërisë për muajin gusht 2025 dhe mobilizimi i strukturave përkatëse për menaxhimin e situatës së zjarreve në vend, ku qeveria do të ofrojë një paketë mbështetëse për dëmet e shkaktuara në fushën e bujqësisë, banesave apo nevojave të tjera që kanë lindur si pasojë e vatrave të zjarrit,” shkruan kryeministri në Facebook.

Gjatë një konference për shtyp, ministri i Mbrojtjes, Pirro Vengu, raportoi se deri më tani janë regjistruar 59 vatra zjarri që kanë djegur mbi 29 mijë hektarë.

“Deri në fund të muajit korrik kemi pasur 59 zjarre masive, zjarr që tejkalon sipërfaqen 1 hektar. Në total mbi 29 mijë hektarë sipërfaqje e djegur: 17 mijë e 500 në Vlorë; 4 mijë e 524 në Dibër; 2 mijë e 425 në Tiranë; 1 mijë e 505 në Berat; 1 mijë e 235 në Shkodër. Rekordi historik në vendin tonë është në vitin 2007, 127 mijë hektarë sipërfaqje e djegur,” tha ministri Vengu.

Forcat e angazhuara, duke përfshirë gjithë zinxhirin e Emergjencave Civile, ishin në total: 14 mijë e 200 vetë, 2 mijë mjete të specializuara ose private, 63 operacione ajrore, katër helikopterë të FA-ve, dy helikopterë hungarezë, dy Canadair të Italisë dhe dy Greqisë, dhe një Canadair nga Kroacia.

“Ne do vijojmë në rinovimin e flotës ajrore. Aktualisht janë të prekura 12 banesa, tre stane, një objekt kulti dhe një nënstacion energjie,” shtoi ministri i Mbrojtjes.

Ministrja e Bujqësisë, Anila Denaj, tha se zona më e prekur është Delvina, ku janë dëmtuar bagëti dhe rreth 230 koshere bletësh.

“Ne jemi ende duke vlerësuar nevojën për ushqim në të gjithë zonën e jugut por edhe në zonën verilindore. Bëhet fjalë për një sipërfaqe toke prej 29 mijë hektarësh, e cila sigurisht përfshin jo vetëm kullota por edhe sipërfaqe me të mbjella. Ne jemi duke menduar një paketë mbështetëse për të rivitalizuar këtë pjesë me të mbjella, në rastin e dëmeve të evidentuara,” theksoi zyrtarja.

Ndërkohë, Ministri i Brendshëm, Ervin Hoxha, sqaroi se shumica e zjarreve ishin zjarrvënie të qëllimshme.

“Përballë kësaj situate reagimi ynë ka qenë i menjëhershëm dhe gjithëpërfshirës. Ky mobilizim ka dhënë rezultat, më kryesorja prej tyre asnjë humbje jete,” u shpreh fillimisht ai.

“Policia e Shtetit përgjatë muajve qershor-korrik 2025 ka identifikuar dhe proceduar 120 persona të dyshuar për zjarrvënie të qëllimshme apo nga pakujdesia dhe ndër to janë arrestuar 21 autorë të këtyre veprave,” tha Hoxha.

Hoxha u bëri thirrje prokurorive të rretheve që kjo vepër penale (zjarrvënie e qëllimshme) të trajtohet me gjithë përgjegjësinë që u jep ligji për këtë fenomen.