Biblioteka Kombëtare e Kosovës ka ndarë mirënjohje “Post-Mortum” për albanologun Skender Gashi, për dhurimin e Bibliotekës së tij personale për Bibliotekën Kombëtare të Kosovës.
Në shtator të këtij viti, nën përkushtimin dhe vullnetin e madh të zonjës znj. Habibe Gashi, të vejës së albanologut të shquar Dr. Skënder Gashi, është mundësuar dorëzimi i kësaj biblioteke.
Biblioteka Kombëtare e Kosovës përmes një komisioni të përbashkët me MPJD-në ka pranuar bibliotekën personale të Gashit që është sjellur nga Vjena në Prishtinë.
Si njëri prej studiuesve më të zellshëm të albanologjisë, prof. dr. Skënder Gashi ishte veprimtar i çështjes së Kosovës dhe asaj shqiptare, shkencëtar dhe studiues i albanologjisë në Prishtinë, Zagreb e Salsburg dhe pati kulturën e lartë për ndërtimin e një biblioteke të pasur private e familjare. Biblioteka personale e prof. Skënder Gashit, numëron një sërë titujsh, disa prej të cilëve janë botime të rralla dhe me vlerë të veçantë.