Nënkryetarja e Lidhjes Demokratike të Kosovës, Hykmete Bajrami ka publikuar një postim në Facebook ku shkruan se gjatë datës 31 Maj 2024 janë publikuar disa kontrata në shumë prej 683 mijë eurosh, shkruan GazetaDemos.
Ajo tha se Komisioni Rregullativ i Prokurimit Publik ka publikuar 4 kontrata njëburimore në shumë prej 683 mijë euro brenda një dite të vetme e madje kontrata të negocuara pa publikim të njoftimit për kontratë.
“Vazhdon korrupcioni – vetëm dje Komisioni Rregullativ i Prokurimit Publik ka publikuar 4 kontrata njëburimore në shumë prej 683 mijë euro. Pra, 683 mijë euro brenda një ditë të vetme!
Dje, dite premte 31 Maj 2024, Komisioni Rregullativ i Prokurimit Publik publikoi katër kontrata njëburimore/kontrata të negociuara pa publikim të njoftimit për kontratë si në vijim:
1. Korporata Energjetike e Kosovës: Ruajtja dhe sigurimi i objekteve të KEK-ut, për dy muaj (qershor-korrik 2024), shuma 448,251.13 euro.
2. Korporata Energjetike e Kosovës: Transport i punëtorëve të KEK-ut, për muajin Qershor-Korrik 2024, shuma 152,884.56 euro.
3. Punë shtesë Ri-tender/ndërtimi i 11 shtëpive në pjesën veriore të Kosovës, Ministria e Mjedisit dhe Planifikimit Hapësinor, shuma 63,725.72 euro.
4. Punë shtesë Ri-tender/renovimi i 4 shtëpive në pjesën veriore të Kosovës, Ministria e Mjedisit dhe Planifikimit Hapësinor, shuma 18,225.30 euro.”, ka shkruar ajo.
Tutje, Bajrami ka shkruar se ky akt është në kundërshtim me nenin 10 të Kushtetutës e madje edhe keqpërdorim i detyrës zyrtare.
“Korrupcioni duhet të ndëshkohet. Në ekonominë e tregut askush s’ka të drejtë që në sektorë ku ka konkurrencë të negociojë kontrata me një kompani. Kjo është në kundërshtim me nenin 10 të Kushtetutës, në kundërshtim me Ligjin e Prokurimit Publik, respektivisht është keqpërdorim i detyrës zyrtare, dëmtim i buxhetit të shtetit – është KORRUPCION.
Korrupcioni duhet të dënohet dhe përgjegjësit të vihen para drejtësisë”, shkroi nënkryetarja e LDK-së.