Arrestohen tre persona pas një përleshje në Prizren, mes tyre një zyrtar policor

Dy qytetarë dhe një zyrtar policor janë arrestuar pas një konflikti fizik që ndodhi të shtunën në mbrëmje në rrugën “Tranziti i Vjetër” në Prizren.

Inspektorati Policor i Kosovës (IPK) përmes një njoftimi zyrtar është njoftuar për rastin nga Policia e Kosovës në Prizren.

Sipas IPK-së, incidenti ka nisur me një përplasje verbale mes disa personave, e cila më pas ka eskaluar në dhunë fizike, duke rezultuar me disa të lënduar trupërisht.

Ndër të dyshuarit e përfshirë në përleshje është identifikuar edhe një zyrtar policor jashtë detyrës, i cili tashmë ishte i suspenduar në lidhje me një rast tjetër.

Të tre personat e arrestuar, dy civilë dhe polici i suspenduar janë ndaluar për 48 orë me urdhër të prokurorit kujdestar të Prokurorisë Themelore në Prizren.

Të dyshuarit po hetohen për veprën penale “Sulm”, sipas nenit 184 të Kodit Penal të Republikës së Kosovës.

Inspektorati Policor ka deklaruar se do të vazhdojë hetimet dhe se çdo përfshirje e mundshme e zyrtarëve të sigurisë në veprime penale do të trajtohet me “paanshmëri dhe profesionalizëm të plotë”.