Arben Blakaj është liruar dje pas marrjes në pyetje nga Prokuroria Themelore në Pejë, pasi ishte arrestuar të mërkurën me dyshimet se e ka ngacmuar seksualisht një nxënëse.
Për Demos ai ka thënë se arrestimi i tij dhe i tërë rasti i është montuar.
“As vet nuk kam ditë çka është tu u ba, veç e di kur mkanë thirrë te sekretari. Kur shkova aty edhe Policia, thanë duhet me ardhë me neve në stacion, i thash a ka mundësi për çka po m’merrni edhe ata më thanë të tregojmë atje. Kur shkova atje më thanë gjoja se e paske ngacmuar një vajzë seksualisht, për momentin mu ka dridh krejt trupi. Tani më erdhen dy policë tjerë m’veten a ki najsen me këtë rast, i thash 100% s’kam dorë sen. Është ardhë një prokuror i Pejës m’ka marr në pyetje edhe unë ju kam përgjigjë në tana aspektet, se ka qenë fjala për do sms që kam shkru me atë vajzen, po ato nuk kanë pasë lidhje kurgjo hiç. Unë atë vajzën e kami lake, na endem me ta familjarisht. Kjo është krejt çka muj me thonë, po ma kanë marr ftyren. Jam babë i tre fëmijëve, ma shumë s’kam çka me thonë”, tha ai për Demos.
“Jam liruar mbrëmë pasi jam marr në pyetje nga Prokurori. Krejt ky rast më është montuar”, ka thënë Blakaj ndër të tjera.
Policia e Kosovës konfirmoi të mërkurën lirimin e Blakajt. Zëdhënësi i Policisë, Fadil Gashi, tha se pas arrestimit dhe intervistimit të tij nga ana e Policisë dhe pasi është njoftuar Prokurori i Shtetit, ai ka konstatuar se nuk ka elemente të veprës penale, “andaj i dyshuari është liruar”.
“Pas intervistimit nga njësitet përkatëse policore është njoftuar prokurori i cili ka vlerësuar se nuk ka elemente të veprës penale”, tha Gashi.
Ngjarja ka ndodhi dje rreth orës 13:00 pasi Policia e Kosovës u njoftua për një rast ku u dyshua se një nxënëse e një shkolle në Istog ishte pre e ngacmimit seksual nga punëtori teknik i shkollës.