Agim Veliu: Qeveria Kurti nuk meriton të vazhdojë të qeverisë me vendin, e mira do të ishte të japë vet dorëheqje

Aleanca për Ardhmërinë e Kosovës me rastin e 3 vjetori të Qeverisë Kurti, ka prezantuar një mocion të mosbesimit ndaj Qeverisë se Kosovës.

Agim Veliu ka treguar nëse do ta mbështetin apo jo mocionin për shkarkimin e Qeverisë Kurti.

Ai ka thënë se Qeveria Kurti nuk meriton të vazhdojë të qeverisë me vendin, por sipas tij opozita e pozita duhet të ulen dhe të listojnë arsyet pse ekzekutivi nuk duhet të vazhdojë punën.

“Kjo qeveri nuk e meriton me qëndru e me qeverisë, por duhet të listohen arsyet e rrëzimit, nuk është me rëndësi forma, a me mocion apo si, por duhet të ulen opozita dhe të listojnë arsyet pse kjo qeveri duhet me përfundu mandatin . Do të ishte më e mira me dhënë vet dorëheqje. Jam ithtar që opozita edhe qeveria që ka shpreh gatishmëri me ju bashku opozitës me u ulë e me fol, të tregohen cilat janë dështimet dhe të pranohen nga Qeveria, e mos të merren më pas si akuza”, ka thënë Veliu për Reporteri.net.

Për këtë çështje të enjten e kësaj jave ka folur edhe vet kryeministri Albin Kurti, i cili ka thënë se partia që drejton është e gatshme t’ia japë opozitës votat e nevojshme për të shkuar në zgjedhje të reja. Por një ditë më vonë Kurti nuk qe i prerë lidhur me qëllimin e ofrimit të votave të Vetëvendosjes për ta shpërndarë Kuvendin e për ta ndërprerë mandatin e Qeverisë, që në konferencën që mbajti për punën trevjeçare të saj u shpreh krenar me të arriturat.

“Kam shprehur gatishmërinë time që nëse opozita dëshiron zgjedhje të jashtëzakonshme mund ta bëjmë me dy të tretat shpërndarjen e Kuvendit dhe të shkojmë në zgjedhje. Nëse opozita është rehat, ne jemi edhe më rehat”, kishte thënë Kurti.