Abbott flet për takimin e 27 shkurtit, mes Kurtit dhe Vuçiqit

Ambasadori i Mbretërisë së Bashkuar në Kosovë, Nicolas Abbott, ka thënë se e mirëpret angazhimin e kryeministrit kosovar, Albin Kurti, për të diskutuar mbi dialogun, në nivel të lartë.

Derisa ka folur për takimin e 27 shkurtit, mes kryeministrit kosovar Albin Kurti dhe presidentit serb, Aleksandar Vuçiq, ai ka thënë kjo është mundësi e Kosovës, për të pasur përparim.

“Kosova ka rol të rëndësishëm për të luajtur përmes angazhimit në mënyrë konstruktive dhe bërjes së kompromiseve të nevojshme që i mundësojnë Kosovës dhe qytetarëve të saj të prosperojnë. Është po aq e rëndësishme të sigurohet një mjedis i sigurt që krijon hapësirë për një marrëveshje të qëndrueshme dhe normalizimin e marrëdhënieve. Me 17 Shkurt, si aleat i palëkundur, iu bashkuam Kosovës në festimin e 15 viteve të pavarësisë. 15 vjet pas pavarësisë, Kosova ka mundësinë të bëjë progres në integrimet ndërkombëtare, zhvillimin ekonomik dhe ndërtimin e një shteti prosperues. Negociatat e suksesshme do ta krijojnë atë të ardhme”, ka shkruar Abbott.