Zyrtari i lartë rus: Putin mund t’i ofrojë Trumpit një “armëpushim dhuratë”

Takimi mes delegacioneve amerikane dhe ruse në Alaskë pritet të përballet me një “nyjë gordiane” diplomatike, për shkak të hendekut të madh mes Moskës dhe Kyiv-it, sipas Andrei Fedorov, ish-zëvendës ministër i Jashtëm rus me lidhje të ngushta me Kremlinin.

Sipas tij, Putini nuk mund të pranojë një armëpushim të menjëhershëm, pasi kjo do të nënkuptonte njohje indirekte të Zelensky-it si president legjitim – një vijë e kuqe për Moskën.

Megjithatë, për të sjellë Trump-in në tryezë, Kremlini mund të propozojë një zgjidhje të përkohshme.

“Një opsion mund të jetë një armëpushim njëjavor, si një ‘dhuratë politike’ për Trump-in”, tha Fedorov për NBC News.

Një tjetër mundësi, sipas tij, është ndalimi i sulmeve ajrore, ose një marrëveshje që do hapte rrugën për bisedime të ardhshme mbi bashkëpunimin ekonomik.

Megjithatë, Trump ka deklaruar nga Air Force One se asnjë lehtësim sanksionesh apo marrëveshje tregtare nuk është e mundur pa një armëpushim të qartë.

Dialogu, për momentin, mbetet një kurth diplomatik.