ZRRE e konfirmon se i ka dhënë licencë EFT-së në vitin 2021, opozita tha se kjo është kompania e Vuk Hamoviq
Zyra e Rregullatorit për Energji (ZRRE) e ka konfirmuar se i ka dhënë licencë se Energy Financing Team LLC (EFT), për të cilën opozita tha se është kompania e Vuk Hamoviqit.
“ZRRE thekson qartë se procesi i licencimit të subjekteve energjetike bazohet në kritere të qarta ligjore dhe rregullative, dhe nuk ndikohet nga akterët e ndryshëm që janë jashtë kornizës ligjore dhe institucionale. Në lidhje me deklaratat e fundit për licencimin e kompanisë EFT, ZRRE informon opinionin e gjerë se kompania Energy Financing Team AG ka qenë e licencuar për ushtrimin e aktivitetit të furnizimit me shumicë (tregti) të energjisë elektrike nga periudha 2006 deri më 2012. Po ashtu, ju informojmë se Energy Financing Team LLC është e licencuar nga ZRRE për ushtrimin e aktivitetit të furnizimit me shumicë (tregti) të energjisë elektrike nga viti 2016 deri 2021 dhe nga 2021 deri më 2026, gjithmonë në përputhje me kornizën ligjore”, tha ZRRE në një njoftim publik.
Në këtë njoftim ZRRE u ankua se po përballet “me presione dhe sulme të vazhdueshme nga akterë të ndryshëm”, ndërsa tha se deri tani ka “ndjekur një qasje të përmbajtur institucionale duke mos u përfshirë në debate politike, me qëllim ruajtjen e paanshmërisë”.
“Pavarësisht kësaj, ZRRE ka siguruar në vazhdimësi komunikim të rregullt dhe transparent me mediat për informimin e publikut dhe përmbushjen e detyrimeve ligjore për transparencë dhe llogaridhënie. Kulmimi dhe mosndalja e këtyre ndërhyrjeve e bën reagimin publik të pashmangshëm”, tha ZRRE, duke shtuar se deklarata të tilla “janë të papërgjegjshme, të dëmshme dhe nuk i shërbejnë as transparencës dhe as interesit publik”.
“ZRRE është institucion i pavarur kushtetues dhe ligjor. Çdo tentativë nga individë apo grupe të caktuara të interesit për ndikim në çështjet rregullative përbën shkelje serioze të parimit të pavarësisë së rregullatorit, cenon sundimin e ligjit, dëmton funksionimin e tregut të energjisë dhe rrezikon në përmbushjen e obligimeve ndërkombëtare të Republikës së Kosovës”.
Visar Azemi i LDK-së për këtë çështje kishte thënë se ministrja në detyrë e Ekonmisë, Artane Rizvanolli, “gënjen kur thotë se kjo qeveri nuk e ka licencuar EFT-në e Vuk Hamoviqit për importim të rrymës”.
Ai kishte publikuar edhe vendimin e ZRRE-së për licencimin e kësaj kompanie.
“E vërteta është se EFT vetëm është “fshehur” pas emrit “Energy Financing Team”. Për licencimin e Vuk Hamoviqit, ka vendim të nënshkruar më 2 shtator të vitit 2021. Këta po harrojnë se ndryshimi i emrit në search nuk e anulon vendimin e as nuk e zhdukë licencën. Artane Rizvanolli ose nuk e di çfarë firmos, ose po gënjen me vetëdije qytetarët”, kishte thënë ai.
