“Zoti i bekoftë aleatët tanë”: Hoti shkruan për 26 vjetorin e nisjes së bombardimeve të NATO-s

“Zoti i bekoft aleatët tanë”, shkroi ish-kryeministri kosovar, Avdullah Hoti, në 26 vjetorin e nisjes së bombardimeve të NATO-s në caqet e ushtrisë serbe dhe infrastrukturën përcjellëse ushtarake të ish-Jugosllavisë.

Hoti shkroi se intervenimi humanitar i NATO-s ishte “i domosdoshëm për t’i dhënë fund një regjimi të pamëshirshëm që ka shkaktuar vuajtje të pafundme për popullin e Kosovës”.

Postimi i plotë:

Sot shënojmë përvjetorin e bombardimeve të NATO-s në Kosovë.

Pas viteve të dhimbshme të regjimit të shtetit të Serbisë, ku dhuna dhe gjenocidi ishin pjesë e politikës shtetërore, bombardimet e NATO-s ishin të domosdoshme për t’i dhënë fund një regjimi të pamëshirshëm që ka shkaktuar vuajtje të pafundme për popullin e Kosovës.

Mijëra njerëz humbën jetën, mijëra u detyruan të iknin nga shtëpitë e tyre, ndërsa mijëra të tjerë u përballën me tortura dhe abuzime të tjera. Qëllimi ishte i qartë asimilimi dhe shkatërrimi e identitetit të shqiptarëve të Kosovës, duke zbatuar një politikë të pastrimit etnik që la pas një traumatizim të thellë.

Bombardimet e NATO-s, ishin nevojë urgjente për t’i dhënë fund kësaj gjendje, duke hapur rrugën për çlirim.

Sot, pas 26 vitesh, kujtojmë ata që humbën jetën dhe ata që kanë kontribuar në lirinë e Kosovës.

Zoti e bekoftë popullin e Kosovës!

Zoti i bekoftë aleatët tanë!

Zoti e bekoftë Republikën e Kosovës!