Zjarri tragjik në Koçan – Një nga të lënduarit vazhdon të jetë në gjendje të rëndë

Gjendja shëndetësore e të lënduarve nga zjarri tragjik në diskotekën “Pulse” në Koçan të Maqdonisë së Veriut vazhdon të jetë e pandryshuar, ndërsa një prej pacientëve vazhdon të jetë në gjendje të rëndë.

Lajmin e bëri të ditur drejtori i Fondit të Sigurimeve Shëndetësore, Sasho Klekovski, në një konferencë për shtyp.

“Gjendja e të lënduarve në diskotekën “Pulse” në Koçan është e pandryshuar. Pesë nga të lënduarit janë jashtë vendit, ndërsa pesë janë në Shkup. Një pacient është ende në gjendje të rëndë”, deklaroi Klekovski.

Ai shtoi se për pacientin në gjendje kritike është marrë në konsideratë edhe mundësia e ndërhyrjes për transplant të lëkurës.

“Mendoj se këto ditë është bërë vlerësim për transplant lëkure më të rëndësishëm për atë pacient. Përndryshe, problemi atje është infektiv dhe po trajtohet në mënyrën më të mirë të mundshme me antibiotikët më të mirë të mundshëm për momentin”, theksoi ai.

Zjarri i rëndë që përfshiu diskotekën “Pulse” në orët e para të mëngjesit të 16 marsit, shkaktoi 62 viktima, ndërsa rreth 200 persona u lënduan dhe u dërguan për trajtim në spitale brenda dhe jashtë vendit.