Zjarrfikësit punuan deri në orët e vona, çka dihet për zjarrin që kalpoi një ndërtesë dje në Emshir?

GazetaDemos mbrëmë ka raportuar deri pak pas mesnatës kur zjarrfikësit arritën ta lokalizojnë zjarrin e përhapurt nga vatra në një ndërtesë në lagjen Emshir të Prishtinës. Përveç dëmeve materiale, nuk pati persona të lënduar, teksa përveç zjarrfikësve në vendngjarje kishte edhe ekipe policore e mjekësore për intervenim të nevojshëm.

Për këtë incident sot është deklaruar Drejtoria për Siguri dhe Emergjenca në Prishtinë.

Nga njoftimi i tyre bëhet e ditur se ekipet e zjarrfikësve punuan në shuarjen e zjarrit deri në orët e vona.

“Deri në orët e vona, ekipet tona emergjente ishin të angazhuara në lokalizimin dhe shuarjen e zjarrit që përfshiu një ndërtesë në lagjën “Kalabria”. Jemi thellësisht mirënjohës për përkushtimin, guximin dhe profesionalizmin e Brigadës Profesionale të Zjarrfikësve, ekipeve të Drejtorisë për Siguri dhe Emergjenca si dhe Policisë së Kryeqytetit, të cilët, 24/7, janë në gatishmëri për të mbrojtur jetën dhe sigurinë e qytetarëve të Kryeqytetit”, thuhet në njoftim.