Zjarr i furishëm përfshin perëndimin e Kanadasë, rreth 17 mijë persona largohen nga shtëpitë

Një situatë emergjente është duke u zhvilluar me shpejtësi në perëndim të Kanadasë për shkak të zjarreve pyjore masive, ku provinca e Manitobës ka shpallur gjendje të jashtëzakonshme dhe ka urdhëruar evakuimin e rreth 17,000 banorëve.

Sipas Qendrës Kanadeze Ndëragjencore të Zjarrit Pyjor, aktualisht janë aktive mbi 166 vatra zjarri në mbarë vendin, ndërsa 84 prej tyre raportohen si “jashtë kontrollit”.

Krahas Manitobës, flakët kanë përfshirë edhe provincat Alberta, Ontario dhe Kolumbia Britanike, duke krijuar një krizë të përhapur në shumë rajone.

Për të përballuar situatën, Forcat e Armatosura Kanadeze janë vendosur në terren për të ndihmuar në evakuimin e banorëve dhe shuarjen e flakëve, njoftoi kryeministri i Manitobës, Wab Kinew.

Zyrtarët e emergjencës paralajmërojnë se, për shkak të erërave të forta dhe kushteve të thata, rreziku për përhapje të mëtejshme të zjarreve mbetet shumë i lartë në ditët në vijim.

Autoritetet u bëjnë thirrje qytetarëve të ndjekin udhëzimet dhe të evakuohen sa më shpejt kur kërkohet.