Zhduket ish i dashuri i Elvana Gjatës, familjarët e lajmërojnë në polici

Familjarët e Ervis Martinajt, një nga të shumëkërkuarit e Policisë së Shtetit dhe Strukturës së Posaçme (SPAK) në Shqipëri, kanë denoncuar të enjten në policinë e Tiranës zhdukjen e tij. Ata thonë se kanë humbur kontaktet prej disa ditësh me të.

Martinaj është shpallur në kërkim nga SPAK pas dëshmisë së të penduarit të drejtësisë, Nuredin Dumanit, pasi akuzohet se ka ofruar deri në 500 mijë euro për ekzekutimin e Endrit Dokles, numrit dy të Bandës së Durrësit.

Ndërkohë, policia dyshon se ai është larguar prej disa muajsh jashtë Shqipërisë në mënyrë ilegale.

Sipas Euronews, Policia ka bërë me dije se denoncimi do të vlerësohet, por nga ana tjetër ka dyshime se mund të jetë edhe inskenim.

Denoncimi i familjarëve vjen pas rreth një muaji nga atentati në Fushë-Krujë ku mbetën të vdekur 3 persona, një prej tyre kushëriri i Ervisit, Brilant Martinaj.

Gjatë tre vjetëve të fundit, shumë të afërm të Ervis Martinajt u ekzekutuan në atentate mafioze.

Ervis Martinaj është një personazh i njohur i botës së krimit, i përfshirë në ngjarje të rënda kriminale, siç ishte incidenti i Bllokut në Tiranë në shkurt të vitit 2018.

Ai gjithashtu ka në pronësi lojëra fati. Është akuzuar edhe për vrasje.

Më herët, ai është dënuar nga Gjykata e Shkallës së Parë Tiranë për fshehje të ardhurash dhe organizim të lojërave të fatit. Kjo çështje ndodhet në Gjykatën e Apelit dhe nuk ka ende një vendim të formës së prerë.

Ervis Martinaj raportohej se ishte në lidhje dashurie me Elvana Gjatën.