Albanian
Croatian
English
French
German
Serbian
Turkish
Qeveria e Kosovës ka vendosur që të shtyjë edhe për 15 ditë afatin për (ri)regjistrimin e automjeteve nga targat serbe të qyteteve të Kosovës në targa RKS me stimulim financiar.
Afati i ri është 15 dhjetori.
“Qeveria e Republikës së Kosovës ka ndryshuar dhe plotësuar Vendimin e Qeverisë të datës 30 tetor 2023, me të cilin është shtyrë afati për regjistrim me përfitime financiare për pronarët e automjeteve me emërtimin ‘PR’. ‘KM’, ‘PZ’, ‘GL’, ‘UR’, ‘PE’ dhe ‘DA’ deri më 15.12.2023”, është kumtuar nga ky institucion.
Shtyrja e afatit është rezultat i kërkesave të shumta dhe interesimit të madh për (ri)regjistrimin e automjeteve me targa RKS, theksohet në kumtesë.
“Afati i mëparshëm skadon sonte, por ekziston mundësia e zgjatjes së tij”, kanë njoftuar dje nga Drejtoria Veriore e Policisë së Kosovës, e cila një kërkesë të tillë ia ka dërguar MPB-së së Kosovës.
“Kemi parë shumë interes në ditët e fundit. Gjithashtu, ka disa vështirësi gjatë kryerjes së kontrolleve teknike. Drejtuesit e automjeteve humbin shumë kohë për këto nevoja administrative. Nuk janë vetëm vetura, ka kamionë, traktorë, kombajna. Ata marrin shumë kohë. Pastaj duhet kohë rreth polisës së sigurimit, për pagesën për këtë”, ka deklaruar dje për KoSSev, Veton Elshani, zëvendëskomandant i Policisë së Kosovës në rajonin e Veriut.
Ai gjithashtu ka theksuar se edhe pse tollovitë për (ri)regjistrime kanë vazhduar pothuajse gjithë muajin e fundit, ato kanë qenë shumë më të mëdha ditëve të fundit. Ai mendon se kjo është për shkak se njerëzit nuk dinin se çfarë të bënin në fillim.
“Drejtoria jonë e ka njoftuar Ministrinë e Brendshme për të gjitha këto, me një rekomandim konkret nga rajoni i veriut – t’u jepet njerëzve edhe 15 ditë”, ka theksuar Veton Elshani.