Zeqiri: Kosova është në izolim, duhet t’i dëgjojë ndërkombëtaret

Aksionin e Qeverisë së Kosovës ku u mbyllën disa posta që operonin pa licencë në veri të vendit, drejtori i Qendrës Evropiane për Çështje të Minoriteteve, Adrian Zeqiri, e quajti legjitim, por që duhet të ketë një koordinim më të mirë me partnerët ndërkombëtarë lidhur me vendime të tilla.

“Çdo hap që e merr qeveria në veri është legjitim, sepse aty kanë funksionuar një numër i madh i institucioneve që s’kanë pasur legjitimitet, por tani qeveria shkon përnjëherë dhe e ndërpret në mënyrë të përnjëhershme funksionimin e këtyre institucioneve, e kjo mund të shkaktojë tensione etnike, duke përfshirë edhe shpërnguljen e serbëve lokalë, çka ne si Kosovë nuk do të duhej ta lejonim. Do të duhej të shiheshim si një qeveri përgjegjëse që merr në mbrojte minoritetet e saj”, deklaroi Zeqiri në emisionin Info Magazine në Klan Kosova.

Tutje ai vlerësoi se Qeveria e Kosovës është në një izolim nga faktori ndërkombëtar, nga faktori i Bashkimit Evropian dhe nga ShBA-të.

“Ky izolim ka ardhur si rezultat i moskomunikimit e i mos renditjes së veprimeve të cilat Qeveria e Kosovës i ka ndërmarrë. Nuk është pozicion i mirë që Kosova të jetë në një pozicion të izolimit”, deklaroi ai.

Sipas Zeqirit, shtrirja e sovranitetit të institucioneve të Kosovës në pjesën veriore është një hap për t’u përshëndetur, por që në të njëjtën kohë nuk duhet që kjo të bëhet në dëm të marrëdhënieve të shëndosha të cilat për Kosovën janë jetike, si ato me ShBA-të dhe BE-në.