Zbulohet rrjet prostitucioni në Durrës, arrestohen 4 shtetase kineze – organizatorja kërkohet në Britani

Policia e Durrësit ka finalizuar me sukses operacionin e koduar “Storm 4”, pas një hetimi dyjavor për veprimtari të paligjshme që lidhen me shfrytëzimin e prostitucionit.

Në kuadër të këtij operacioni të zhvilluar në lagjen nr. 13, Plazh, Durrës, u arrestua shtetasja kineze F. W., 46 vjeçe, e cila dyshohet se ishte organizatorja dhe drejtuesja e rrjetit të prostitucionit.

Po ashtu, u arrestuan edhe tre shtetase të tjera kineze: L. M. (55 vjeçe), L. Ch. (49 vjeçe) dhe Zh. H. (47 vjeçe), për veprën penale “Prostitucioni”. Në vijim të hetimeve, u proceduan penalisht në gjendje të lirë edhe dy shtetase kineze dhe tetë shtetas shqiptarë.

Autoritetet shpallën në kërkim shtetasen K. P., 46 vjeçe, banuese në Mbretërinë e Bashkuar, e dyshuar për përshtatjen e ambienteve për zhvillimin e aktivitetit të paligjshëm.

Nga hetimet u zbulua se një vilë dykatëshe e marrë me qira ishte përshtatur si ambient për ushtrimin e prostitucionit. Në cilësinë e provës materiale u sekuestruan pasaporta, para cash në euro e dollarë, karta banke dhe telefoni.

Dyshohet se aktiviteti ishte i lidhur me një rrjet më të gjerë jashtë vendit, i koordinuar përmes një call center-i.

Hetimet janë në vijim.