Zakharova: Ndryshimet në qeverinë gjermane nuk janë të rëndësishme për Rusinë

Zëdhënësja e Ministrisë së Punëve të Jashtme të Rusisë, Maria Zakharova, deklaroi se ndryshimet në qeverinë gjermane nuk janë të rëndësishme për Rusinë, duke theksuar se Gjermania ka humbur kryesisht sovranitetin, autoritetin dhe rolin e saj në skenën ndërkombëtare vitet e fundit.

“Nuk ka arsye të pritet një përmirësim në marrëdhëniet midis Moskës dhe Berlinit, veçanërisht duke pasur parasysh deklaratat e shumta militante dhe rusofobe të politikanëve gjermanë. Marrëdhëniet ruso-gjermane janë shkatërruar pothuajse deri në themel për një kohë të gjatë, falë përpjekjeve të qeverisë së (ish-kancelarit) Olaf Scholz”, theksoi Zakharova, duke iu përgjigjur një pyetjeje në lidhje me formimin e një qeverie të re në Gjermani, raportoi TASS.

Ajo shtoi se, megjithëse ka spekulime rreth dërgesave të mundshme të raketave kruiz Taurus në Ukrainë, ekzistenca e opinioneve të ndryshme midis aleatëve dhe partnerëve të Gjermanisë mund ta bëjë të vështirë marrjen e një vendimi përfundimtar.

Ajo kujtoi gjithashtu dërgesat e mëparshme të pajisjeve ushtarake gjermane në Ukrainë, duke deklaruar se, ashtu si automjetet luftarake “Puma” dhe tanket “Leopard”, “Taurus” “nuk do ta shpëtojë regjimin ukrainas të Presidentit (Volodymyr) Zelensky”.

Presidenti gjerman Frank-Walter Steinmeier emëroi zyrtarisht Friedrich Merz si kancelarin e ri gjerman dje, pasi Merz u votua në atë pozicion në Bundestag dhe në raundin e dytë të votimit.

Gjatë ceremonisë në pallatin presidencial, Steinmeier konfirmoi gjithashtu emërimet e 17 ministrave në qeverinë federale. Mertz është kancelari i 10-të i Republikës Federale të Gjermanisë.