Albanian
Croatian
English
French
German
Serbian
Turkish
Shoqëria e avokatëve “Tahiri & Partners Law Firm LLC”, e cila udhëhiqet nga kryetari i degës së LDK-së në Vushtrri, Xhafer Tahiri, e ka pranuar se Faruk Mujka, ish-kryetar i degës së VV-së në Mitrovicë, është klient i tyre.
Në një përgjigje përNacionale, nga kjo kompani kanë treguar se janë duke e mbrojtur Mujkën në rastin që dyshohet se ka keqpërdor pozitën zyrtare sa ka qenë nënkryetar i komunës së Mitrovicës së Jugut.
Kompania ka hezituar të komentojë shumë për rastin.
“Po, z. Faruk Mujka është klient i yni, rasti është në fazën e hetimeve, prandaj nuk mund të komentojmë me tutje”, ka treguar kompania.
Ndër të tjera, kompania ka sqaruar se klientët e tyre nuk i dallon mbi baza partiake.
“Shoqëria e avokatëve Tahiri & Partners Law Firm LLC ka një gamë të gjerë të klientëve. Klientët tanë nuk i dallojmë mbi baza partiake, religjioze etnike apo fetare. Z. Xhafer Tahiri është themelues i Tahiri & Partners Law Firm LLC, ( https://tahiripartners.com), ndërsa profesionin e avokatit e ushtron nga viti 2017, me një ndërprerje në kohën kur shërbeu në Vushtrri si Kryetar i Komunës”, ka bërë me dije kompania.
Në muajin korrik, Faruk Mujka, i cili e ushtron pozitën e kryeshefit të ekzekutiv të Bordit të Ndërmarrjes Hidro-ekonomike “Ibër-Lepenci, ishte arrestuar.
Prokuroria Speciale e Kosovës kishte treguar arsyet e arrestimit.
“Prokuroria Speciale e Republikës së Kosovës lidhur me këtë rast njofton opinionin publik se në maj të vitit 2022 ka pranuar informacione, lidhur me dyshimet për keqpërdorim të pozitës dhe autoritetit zyrtar nga dy persona, në atë kohë pjesë e strukturave udhëheqëse në komunën e Mitrovicës së Jugut. Menjëherë pas pranimit të këtyre informacioneve PSRK ka autorizuar Policinë e Kosovës, për ndërmarrjen e veprimeve hetimore, me qëllim mbledhjen e provave. Pas marrjes së informacionit në bazë të autorizimeve të PSRK-së, Policia e Kosovës ka ndërmarrë një sërë veprimesh hetimore, ndërsa me datë 03.07.2023, ka paraqitur Kallëzim Penal ndaj zyrtarëve me inicialet F.M. dhe H.M., me dyshimin se gjatë kohës sa ishin pjesë e udhëheqësisë në komunën e Mitrovicës së Jugut, gjatë vitit 2021, janë përfshirë në kryerjen e veprës penale ‘’Keqpërdorim i pozitës dhe autoritetit zyrtar’.’, e sanksionuar me nenin 414 të Kodit Penal të Republikë së Kosovës”, ishte thënë në njoftimin e Prokurorisë Speciale.
Më pas, me vendim të Gjykatës, Mujka është liruar nga paraburgimi, duke u mbrojtur në liri.