Albanian
Croatian
English
French
German
Serbian
Turkish
Edhe një përplasje brenda Lëvizjes Vetëvendosje. Çarja e re në partinë e udhëhequr nga Albin Kurti është ajo në regjionin e Mitrovicës. E gjitha nisi për shkak të një mbledhje partiake, teksa në VV janë duke u zhvilluar zgjedhjet e brendshme.
Kryetari i Degës së Lëvizjes Vetëvendosje në Mitrovicën e Veriut, dhe njëherësh edhe ish-kandidat nga VV për kryetar të kësaj komune, Erden Atiq, i ka dëshiruar deputetes Fjolla Ujkani hiç më pak se theqafje.
Në postimin e tij në Facebook, Atiq është treguar paksa enigmatik. Ai ka përdorur inicialet për t’iu referuar zonjës Ujkani, e cila është deputete në Kuvendin e Kosovës.
“Porosi për deputeten: F.U, udha e mbarë në theqafje”, ka shkruar Artiq para se ta fshinte këtë status.
Por, Atiq duket se u pendua për “mallkimin” që i bëri Ujkanit, pasi që statusin e njëjtë, ai tashmë e ka fshirë.
Duket se porosia për theqafje e Atiqit e ka çuditur shumë edhe Ujkanin. Madje, ajo nuk ka arritur ende të kuptojë se pse erdhi deri tek ky “mallkim”.
Në një prononcim për gazetën, deputetja Fjolla Ujkani deklaroi se nuk e di pse e ka shkruar atë uratë ogurzezë për të.
“Për besë unë nuk kam mujtë me kuptu, se kam raporte shumë të mira me të e kështu që iu kisha sygjeru me thirr dhe me e pytë, sepse nuk kam kontaktu me të dhe sinqerisht nuk e di pse ai ka shkru ashtu”, është shprehur ajo.
Kjo përplasje ka ndodhur për shkak të zgjedhjeve të brendshme në VV, të cilat ende nuk kanë përfunduar.
Nacionale ka mësuar se deputetja Ujkani mori pjesë në një tubim në lagjen “Ilirida” në Mitrovicë, e cila prezencë duket ta ketë irrituar Atiqin, që është edhe mik i kryeministrit Albin Kurti.
Përplasja e parë ndërmjet dy anëtarëve të VV-së nisi shumë më herët, ndërsa u riaktualizua pas tubimit në lagjen “Ilirida”.
Kjo përplasje ekziston që nga koha kur deputeti Armend Muja refuzoj të paraqes kandidaturën për Kryetar të Mitrovicës, dhe hapi rrugën për Agim Bahtirin.
Në anën tjetër, Ujkani nuk e pohon se tubimi i VV-së mund të jetë shkak i kësaj përplasje.
“Nuk e di ai ka qenë tubim normal, shkojnë krejt deputetët e këtij regjini 02, krejt në rregull. Nuk e di çka ka pas, ndoshta e ka me dikë personale, se tash janë bo edhe aktivista shumë”, tha Ujkani për Nacionale.
Kujtojmë që Lëvizja Vetëvendosje tashmë është duke i mbajtur zgjedhjet e brendshme partiake.
Ndryshe, deputetja Ujkani ishte bërë e njohur për qëndrimin e vendosur kundër projekt-kodit civil, i cili parashihte të drejtën e bashkimit civil të seksit të njëjtë.