Vrasje me pagesë dhe hakmarrje, Erion Alibej rrëfen për tjera krime mes bandave të Elbasanit dhe Durrësit

I penduari i drejtësisë, Erjon Alibej, ka vijuar edhe këtë të martë dëshminë e tij përpara Gjykatës së Posaçme, lidhur me masakrën e Bradasheshit, ndodhur më 29 dhjetor të vitit 2018, ku u vra vëllai i tij Endrit Alibej, xhaxhai i tij, si dhe një mik i tyre, shtetas turk.

Alibej ka dhënë detaje për vrasjen e Dorjan Shkozës, për të cilin tha se kishte paguar deri në 100 mijë euro. Ndërsa armën ja kishte gjetur një person që e thërriste “hoxhë”. Sipas tij, në planin e hakmarrjes ai vendosi lidhje me personazhe të tjerë të krimit si Nuredin Dumani, Plarent Dervishi etj.

“Për Dorjan Shkozën kam paguar 100 mijë euro. Nga hoxha janë blerë disa armë, varionin çmimet nga 500–1000 deri 3500 euro. Me Nuredinin flisja për Talo Çelën, që pas vrasjes së Dorjan Shkozës do u bënte i gjallë apo jo. Gjithashtu vijoja investigimin për Altin Ndocin. Ky shkonte shpesh në Durrës, te vëllezërit Haxhia. Në Sky ECC më shkruante Plarent Dervishi, kam pasur kontakt me të. Ai kishte kodet ‘Barcelona’ dhe ‘Gost’. Plarenti më tha: ‘M’bohet qefi që e ke gjet Talo Çelën’. Unë u habita nga e dinte ky, pastaj u kujtova që Plarenti kishte shumë muhabet me Festim Qolin.”

Alibej kishte dyshime se Altin Ndoci dhe Besmir Haxhia ishin të përfshirë në ekzekutimin e vëllait të tij, ndaj tregoi si u organizua atentati ndaj tyre, ku pagoi deri në 150 mijë euro.

“Kishim një makinë ‘Toyota’ të vjedhur që e kisha blerë në Shijak, ja dhashë Nuredinit dhe armët që ai donte, ja dhashë te pazari i Rrogozhinës. Ishte me Klevis Allën kur e mori. Më pas, Nuredini kërkoi edhe 50 mijë euro. Ja çova me një mikun tim dhe i çova 150 mijë për të vijuar. Këtë e bëra që edhe Nuredini të shikonte që unë kisha lekë dhe të kishte besim.”

Në këtë atentat, shënjestër ishte Besmir Haxhia dhe Altin Ndoci, por jo Viktor Haxhia. Ndoci kishte zbritur nga makina. Në vendngjarje mbeti i plagosur edhe njëri prej autorëve, Klevis Alla, i cili më pas u bë gjithashtu bashkëpunëtor i drejtësisë.

Alibej shtoi se gjatë kësaj kohe ka biseduar edhe me “Mirin e Pojës”. Dyshohet se bëhet fjalë për Fatmir Troplinin, i cili i kishte thënë se Klevis Alla ka filluar të flasë.
Alibej tregoi edhe për platformat e koduara që përdorte.

Ai ka rrëfyer edhe për gjurmimin e vazhdueshëm të Talo Çelës, që fshihej te banesa e vëllezërve Haxhia.

“Pas vrasjes së vëllezërve, mora vesh që Talo kishte qëndruar te shtëpia e Haxhiajve. Kur mësova në TV që Klevis Alla po nxirrte emra, Nuredini në këtë kohë u shkëput dhe bashkë me familjen e tij rrinte në Spille, tek vjehrra. Ai s’e dinte nëse po flitej për të, pasi i shkoi edhe policia në banesë, por ai kishte ikur. Flisja gjithë kohës me të në Sky ECC.”

Ndër të tjera, Alibej tha se edhe Rigers Runaj, i vrarë në vitin 2020, ishte i lidhur me grupin që i vrau familjarët, duke i dhënë informacione për lëvizjet e tyre./vizionplus