Veteranët i çojnë letër Komisionerit të KE-së, kërkojnë hetime ndaj Speciales

Veteranët e Ushtrisë Çlirimtare të Kosovës i kanë dërguar letër edhe Komisionerit për të Drejtat e Njeriut të Këshillit të Evropës, Michael O’Flaherty, pas asaj që ia dërguan Richard Grenellit, të Dërguar për Misione të Posaçme të Presidentit të ShBA-së Donald Trump.

Organizata e Veteranëve të Luftës së UÇK-së, kërkuan që të nisë një hetim ndërkombëtar dhe i pavarur mbi shkeljet sistematike të të drejtave të njeriut ndaj të akuzuarve që po mbahen në Hagë.

Në letër thuhet se Dhomat e Specializuara po bëjnë abuzime procedurale mbi këtë çështje, duke shtuar se procedurat janë njollosur nga paraburgime të tejzgjatura.

“Sot, Dhomat e Specializuara nuk i ngjajnë më një institucioni gjyqësor të ndërtuar mbi vlerat evropiane të të drejtave të njeriut. Ato janë shndërruar në një strukturë të mbyllur hermetikisht, që funksionon në izolim të plotë nga sistemi ligjor i Kosovës, institucionet e saj demokratike dhe mekanizmat e mbikëqyrjes kushtetuese. Procedurat e tyre janë të njollosura nga paraburgimet e tejzgjatura, redaktimet e tepruara të dokumenteve, vonesat në dorëzimin e provave dhe kufizimet në ndihmë juridike. Dhomat e specializuara refuzojnë të marrin parasysh edhe Avokatin e Popullit të Kosovës, institucionin që ekziston pikërisht për të mbrojtur të drejtat themelore dhe i cili ka të drejtë të plotë, si në kuadër të sistemit ligjor të Kosovës, ashtu edhe sipas të drejtës ndërkombëtare, të hetojë shkeljet e mundshme. Por qëndrimi i gjykatës është i qartë, ato nuk japin as përgjigje, as shqyrtim, as llogaridhënie”, thuhet në letrën e Organizatës së Veteranëve të Ushtrisë Çlirimtare të Kosovës.

Tutje, aty shkruan se ajo që kishte nisur si instrument drejtësie, është shndërruar “në diçka krejt tjetër”.

Veteranët iu drejtuan komisionerit O’Flaherty se kjo çështje s’është ligjore, por e të drejtave të njeriut.