Vetë nuk mori pjesë, kë e dërgoi Osmani në ceremoninë e inaugurimit të Presidentit Trump

Presidentja Vjosa Osmani nuk ka marrë pjesë në ceremoninë e inaugurimit të Presidentit të Shteteve të Bashkuara të Amerikës, Donald Trump, që u mbajtë të hënën në Kongres, mirëpo atje ka dërguar një delegacion. Pjesë e këtij delegacioni kanë qenë Shefja e Stafit, Learta Hollaj dhe Këshilltarja për Politikë të Jashtme, Rejhan Vuniqi, të shoqëruara nga Ambasadori i Kosovës në ShBA, Ilir Dugolli.

Në të gjitha takimet, Presidenca ka thënë se delegacioni ka përcjellë urimet më të mira për Presidentin Trump dhe administratën e re në emër të Osmanit dhe qytetarëve dhe është konfirmuar angazhimi i vendit për avancimin e mëtejshëm dhe të vazhdueshëm të raporteve bilaterale.

“Në bisedat me zyrtarët amerikanë është theksuar gjithashtu rëndësia e vizitave të ndërsjella, si dhe rëndësia e bashkëpunimit me qëllim të avancimit dhe ruajtjes së sigurisë në rajon dhe përtej”, thuhet në njoftim.

Në njoftimin e lëshuar nga Presidenca thuhet se delegacioni ka biseduar me Kryetarin e Dhomës së Përfaqësuesve në Kongresin amerikan, Mike Johnson, të nominuarin për Drejtor të CIA-s, John Ratcliffe; Kongresistin dhe Kryesuesin e nënkomitetit për Evropë në Komitetin për Politika të Jashtme të Dhomës së Përfaqësuesve të SHBA-ve, Keith Self, Kongresistët Chip Roy, Ronny Jackson, John Cornyn, Ted Cruz; Guvernatorin e Teksasit, Greg Abbott, Guvernatoren e Ioëa, Kim Reynolds, Ambasodorin e nominuar të Presidentit Trump në NATO, Matt Ëhitaker; Zëvendës Guvernatorin e Teksasit, Dan Patrick; Prokurorin e Përgjithshëm të Teksasit, Ken Paxton; ish-Sekretarin e Përgjithshëm të NATO-s, Jens Stoltenberg; Senatoren e Teksasit, Angela Paxton; Këshilltarin lokal, Gino Mulliqi; dhe ish-Kongresistin Jack Fields, si dhe përfaqësues të shumtë të mërgatës.

Delegacioni ka marrë pjesë në ceremoninë e betimit të Presidentit Trump në Capitol Hill, Tubimin e mbajtur para ceremonisë së betimit në Capital One Arena, Ballon e Komandantit Suprem; Ballon Presidenciale “The Liberty Ball”, Ballon “Black Tie and Boots”, të organizuar nga Texas State Society, Midwest Galla, pritjen e organzuar nga Dr. Miriam Adelson, Tilman Fertitta, Sylvie Legere & Todd Ricketts e Mark Zuckerberg, si dhe në Shërbesën e Lutjeve Kombëtare në Ëashington National Cathedral.