Vëllai i dizajnerit Festim Isufi: Kam informata se në këtë rast është i përfshirë edhe një person i tretë

Pak më shumë se një muaj pas vdekjes tragjike të dizajnerit të njohur nga Gjilani, Festim Isufi, familjarët ende nuk kanë marrë përgjigje përfundimtare lidhur me rrethanat e ndarjes së tij nga jeta.

Vëllai i tij, Lulzim Isufi, ka folur për emisionin “Kosova Today”, ku ka bërë deklarata të forta që hedhin dyshime mbi mundësinë e përfshirjes së një personi të tretë në rastin e ndjeshëm.

“Akoma nuk e kemi marrë raportin e autopsisë. Nuk ka asgjë të sigurt, nuk kemi marrë asgjë”, deklaroi Lulzimi, duke nënvizuar se familja vazhdon të qëndrojë në pritje të rezultateve zyrtare nga organet hetimore.

Ai shton se pavarësisht mungesës së konfirmimeve zyrtare, ka informacione që i japin arsye të besojë në një skenar më kompleks se sa ato që janë raportuar.

“Sipas informatave që kam vetë unë personalisht, pa prokurori, pa asgjë, me sa e di unë, këtu është i përfshirë një i tretë. Ama pa qenë 100 për qind i sigurt, nuk mund të them më shumë”, u shpreh ai.

Vëllai i stilistit të njohur theksoi më tej: “Besoj që edhe prokuroria e di që ka edhe të tjerë të përfshirë. Ne nuk i përzihemi prokurorisë çka bën, por me sa kam informacion, është edhe një i tretë i përfshirë. Kam thënë që po dyshoj, mirëpo tani në bazë të informacioneve që kam, po besoj që kjo është e sigurt”.

Festim Isufi u gjet i pajetë më 9 maj 2025 në banesën e tij në Prishtinë, dhe që nga ajo kohë, lajmi tronditi opinionin publik dhe komunitetin artistik në Kosovë e më gjerë.

Deklaratat e vëllait të tij kanë risjellë vëmendjen ndaj këtij rasti, duke rritur presionin publik për zbardhjen e plotë të çështjes.

Opinioni tashmë pret me vëmendje çdo zhvillim të ri nga prokuroria, ndërsa familja e të ndjerit vazhdon të kërkojë të vërtetën për humbjen e njeriut të tyre të dashur.