Vdes Bajram Qerkini

Njeriu që u bë zë në kërkim të drejtësisë për personat e zhdukur, Bajram Qerkini ka vdekur këtë të hënë, shkruan GazetaDemos.

Lajmin e kanë bërë të ditur familjarët e tij, teksa kanë treguar se varrimi do të bëhet në mesiditën e së martës.

Njoftimi i plotë:

Baca Bajram (Bajram – Zenel – Qerkini),
Bali ynë i dashur,

Sot i mbylle sytë për të kaluar në amshim. Vdekja të mori dhe të ngjiti në Olimpin e njerëzve që lanë gjurmë për këtë vend. Vërtet, të Zotit jemi dhe vetëm tek Ai është kthimi. Ti sot shkove te Lartmadhëria e Tij.

Sëmundja që të mbajti shtrirë tash e tre muaj ishte pushimi për një jetë plot sakrifica dhe brenga. Sot, u bashkohesh Babës Zenel dhe Babës Sadik, të cilët ndërruan jetë pa e ditur fatin e baballarëve të tyre. Ti shkove me boshllëkun për Reshatin. Njëzet e pesë vite përpjekje për të ditur fatin e djalit dhe të personave të tjerë të pagjetur nga lufta në Kosovë. Njëzet e pesë vite me veshin dhe syrin hapur, duke pritur një lajm për ta. I mbylle sytë dhe veshët sot, pa e marrë atë lajm.

Parajsa e Zotit të Mëshirshëm është për njerëzit me brengat e tua. Kurrë nuk heshte, kurrë nuk u lodhe, kurrë lotin nuk ta pamë. Gjama dhe loti yt ishte gjamë burrash shqiptarë: heshtje, vetmi në mërzinë që pate, dhe punë e palodhshme.

Vepra jote, Bal i dashur, është epitaf për çdo familjar të personave të pagjetur në Kosovë.

Ne sot humbëm shumë: humbëm babain, gjyshin, vëllain, axhën, kushëririn, por mbi të gjitha humbëm prijësin tonë.
Faleminderit për krejt kujtimet e bukura.
Faleminderit për kujdesin që na mbajte bashkë si familje.
Faleminderit që nuk u lodhe asnjëherë së shërbyeri.

Në këtë prag Ramazani, kur simboli i tij është iftari i parë që do ta çelnim në sofrën tënde, së bashku me djemtë, vëllezërit dhe nipat e tu, Zoti të mëshiroftë dhe të dhëntë shkallët më të larta të Parajsës, ty Bal, korife i kërkimit të së vërtetës dhe zë i vuajtjeve të këtij populli.

Të falënderoj për të gjitha këshillat, fjalët dhe rrëfimet që na ndihmuan dhe na ndihmojnë të jemi më të mirë.
Do të na mungosh familjes, por do t’i mungosh patjetër edhe Kosovës!

(Varrimi do të bëhet ditën e martë, më 25.02.2025, në orën 12:00, në varrezat e qytetit në Shipol të Mitrovicës).