Vazhdon lufta: Raportohet për “betejë tankesh” mes Ukrainës dhe Rusisë

Forcat pushtuese ruse po vazhdojnë të kryejnë aksione agresive në Ukrainë.

Forcat e Armatosura Ukrainase raportojnë se beteja vazhdon pranë aeroportit Hostomel.

“Trupat armike u ndaluan gjithashtu në zonat e Hremyach dhe Krolevets”, shkruan media ukrainase Ukrinform.

“Nga ora 17:00 e datës 24 shkurt, armiku vazhdon të veprojë në mënyrë agresive në të gjithë vijën e kufirit të përbashkët. Republika e Bjellorusisë kryen veprime demonstruese nga fushat ajrore përgjatë pjesës veriore të kufirit shtetëror. Në rajonin verior, armiku u ndalua në lumin Uzh në zonat Velyki Osniaky, Rivnopillia dhe një betejë tankesh po vazhdon”, postoi shërbimi për shtyp i Shtabit të Përgjithshëm të Forcave të Armatosura të Ukrainës në Facebook.

Siç u përmend, njësitë e brigadës së parë të tankeve të veçanta të Forcave të Armatosura të Ukrainës ndaluan kolonat e automjeteve të blinduara të armikut në zonën Baturyn dhe në periferi të Chernihiv.

“Armiku u përpoq të zbarkonte forcat taktike të sulmit ajror përgjatë rezervuarit të ujit të Kievit”, thuhet në deklaratë.

“Njëzet helikopterë KA-52 dhe Mi-8 të Federatës Ruse u ulën në aeroportin Hostomel. Beteja është në vazhdim”, thuhet tutje aty.

Përveç kësaj, Garda Kombëtare e Ukrainës hyri në betejë pranë qytetit të Prypyat. Forcat taktike të sulmeve ajrore ruse zbarkuan në zonat operacionale Besarabsky dhe Tavriysky.

Sipas Ukrainës, pas një përpjekjeje të pasuksesshme uljeje dhe një sulmi të pasuksesshëm rakete, kryqëzori i raketave ruse filloi të bombardojë ishullin Zmiyinyi.