Varroset Ermal Delija, shokët e tij kërkojnë nga organet e drejtësisë të mos ndikohen nga falja

Është varrosur Ermal Delija, 26-vjeçari që ishte sulmuar disa muaj më parë në Mitrovicë.

Në ceremoninë mortore të tij, familjarët rrëfyen se gjendja e tij shëndetësore, pas rrahjes, ishte e rëndë, edhe pas daljes së tij nga koma.

Në varrim mori pjesë edhe hoxha Fatmir Latifi, që muajin e kaluar kishte iniciuar faljen, në të cilin rast kishte marrë pjesë edhe vetë i ndjeri.

Latifi tregoi se ishte dëshirë e Delijajt që ta falë familjen e sulmuesit, që kjo çështje të mos bëhet barrë e familjes së tij.

Mirëpo, shokët e të riut kanë frikë se kjo falje mund të ndikojë në vendimin e institucioneve të drejtësisë.

Prokuroria Themelore në Mitrovicë, në përgjigjen për Klanin, tha se B.H., që e kishte sulmuar 26-vjeçarin, është i akuzuar për lëndim të rëndë trupor, por kjo mund të ndryshojë në varësi të konstatimit të shkakut të vdekjes në raportin e autopsisë.