Shkruan Hafiz Gagica
Në prag të takimeve të radhës mes Kosovës dhe Serbisë me ndërmjetësuesit evropian dhe me mbështetjen amerikane, mendoj se pala shqiptare duhet të tregojë urtësi dhe vigjilencë, meqë koha kërkon që interesi i vendit tonë të vihet mbi çdo interes partiak dhe grupor!
Kryeministri i Republikës së Kosovës, z. Albin Kurti, ka mandat kushtetues për negocim, ngase pas vetes e ka edhe shumicën parlamentare, por e ka edhe obligimin politik dhe kombëtar që në koordinim me opozitën t’i bashkërendis vendimet që duhet të merren në dobi të vendit në ditët dhe javët e ardhshme, në pajtimin me marrëveshjen dypalëshe, Kosovë-Serbi, siç e ka obligim edhe opozita që ta kryen detyrën e saj kushtetuese, të jetë konstruktive dhe në përkrahje të shefit të ekzekutivit.
Në dekadën e fundit, skena politike polarizuese në Kosovë ka lënë një pasqyrë të keqe në opinion, sikur që ishin edhe disa marrëveshje të nxituara dhe të dëmshme për vendin, të cilat siç po shihet sot, me mjaftë vështirësi do të korrigjohen, prandaj në të ardhmen nuk duhet lejuar të përsëriten të njëjtat gabime. Veçse bashkërisht të gjithë faktorët tanë politik dhe partiak duhet të jenë krah të kryeministrit Kurti, si krye-negociator i Kosovës në dialog me Serbinë.
Unë besoj se kryeministri Kurti, në harmoni të plotë me kompetencat e tij kushtetuese si dhe me objektivat nacionale dhe politike të Kosovës, në koordinim të ngushtë me aleatet tanë strategjik do i merr vendimet e tij në favor të Planit evropian (franko-gjerman), i mbështetur nga SHBA-të, me nënshkrimin e të cilit Kosovës do i hapën dyert dhe mundësitë për t’u anëtarësue në gjitha mekanizmat e BE-së dhe ato ndërkombëtare, si një mundësi e re për zhvillim më të shpejtë ekonomik të Kosovës.
Takimi i Ohrit, pritet të shkon një hap më afër mirëkuptimit dhe fqinjësisë së mirë me Serbinë, e cila duhet të ndërtohet patjetër, ndonëse me shumë pengesa dhe shantazhe nga fqinji ynë verior, por siç e dimë të gjithë me fqinjët duhet të bisedojmë si dhe të merremi vesh për shumë çështje, prandaj më mirë sot të bisedojmë se sa nesër, kur edhe mund të bëhet tepër vonë.
Kosova e ka dëshmue përherë gatishmërinë e saj për fqinjësi të mirë, dhe këtë diskurs po e tregon qartë me tri shtetet tjera fqinje, andaj i gjithë procesi për një Ballkan të qetë dhe stabil, do varet nga hapat që do i ndërmerr Serbia ditët në vijim, mbase edhe pa njohjen reciproke Kosova do zhvillohet më tutje, siç do bëhet edhe pjesë e organizatave ndërkombëtare, sepse Serbia nuk e ka pafundësisht monopolin që ta pengojë Kosovën që të anëtarësohet në OKB dhe BE.
Të urojmë që me 18 mars Kosova do e shënojë fitoren e madhe ndaj të keqes, që shqiptaret më në fund të ndjehen përfundimisht të çliruar shpirtërisht nga barra e rënd e një historie tragjike, ngase nga 11 marsi 1981 asnjëherë populli shqiptar nuk u ndalë së vepruari dhe luftuari për lirinë dhe pavarësinë e saj. Po ashtu, është edhe koha e fundit që Serbia hegjemoniste të lirohet nga politikat e saja agresive ndaj Kosovës dhe kombit shqiptar!