Ujmani është çështje e mbyllur, thotë Kurti

Çështja e liqenit të Ujmanit është e mbyllur për Qeverinë e Kosovës. Kryeministri i vendit, Albin Kurti, ka thënë se s’mund të vihet asnjëherë në pikëpyetje pronësia e këtij liqeni.

Ditë më parë, Shtetet e Bashkuara të Amerikës publikuan raportin e fizibilitetit të Ujmanit bazuar në Marrëveshjen e Washingtonit të vitit të shkuar. Raporti nxori katër rekomandime, të cilat ende s’janë komentuar nga Qeveria e Kosovës.

Në një intervistë për televizionin publik të Kosovës, Kurti ka thënë se pasi që Serbia s’është ankuar kur ka pasur mundësi për këtë, çështja është e mbyllur.

“Ujmani është liqe artificial, nuk është liqe natyror, ku i ka rënë kufiri dhe e ka nda në dy pjesë. Është liqe artificial. Në të, Kosova është ajo e cila ka investuar dhe është kapitull i mbyllur me ish-Jugosllavinë. Serbia ka mundur të ankohej andej në atë kohë. S’është ankuar. Kjo ëçshtë mbyllur si çështje. S’mund të vihet asnjëherë në pikëpyetje pronësia. Ekspertët tanë janë duke i shqyrtuar të gjeturat dhe ne natyrisht që do të përdorim argumentet në favor të konfirmimit të sovranitetit dhe zhvillimit tonë. Problematike ka qenë ajo shprehja ‘share’ që do të thotë kur ndan diçka së bashku. Nuk jam optimist për komisionet e përbashkëta Kosovë-Serbi në kushte të mungesës së njohjes”, ka thënë Kurti, pak pasi e ka quajtur të çuditshëm tekstin e zotimeve të Washingtonit.

Ai ka thënë se në mesin e gjitha pikave që janë nënshkruar, pika më e mirë ka qenë ajo për njohjen nga Izraeli.

“Është interesant të shikohet pse në ato zotime s’ka dhënë nënshkrimin ish-presidenti amerikan Donald Trump. Teksti i zotimeve të Kosovës dhe palës serbe s’është i njëjtë. Është i çuditshëm ai tekst. Teksa nuk i konsiderojmë merre ose lëre në tërësi, pika e fundit ishte më e mira, njohja nga Izraeli”, ka thënë ai duke shtuar se sheh pika të diskutueshme e edhe problematike në ato zotime.

Reklama