U vandalizua posteri i komandant Lleshit në Bujanoc, reagon nënkryetari: U orkestruar nga Beogradi

Komuna e Bujanocit për të përkujtuar në 24-vjetorin e vrasjes Ridvan Qazimin, i njohur me nofkën komandant Lleshi, kishte vendosur në qytet disa posterë  nëpër hapësirat që njihen si “city lights”.

Por, duket se dikujt nuk i pëlqeu kjo gjë, dhe vendosi që të demolojë një nga këto hapësira. Sipas pamjeve të publikuara nga portali “Spektri”, një person shihet me një çekan në dorë teksa godet reklamën me xhama në të cilën gjendej posteri i komandant Lleshit, dhe më pas e shqyen të tërin.

Për këtë vandalizim ka reaguar zëvendëskryetari i Komunës së Bujanocit, Shqiprim Musliu, ai e dënoi këtë akt duke thënë se është një veprim antishqiptar, i orkestruar nga Beogradi me marionetat e tyre në Bujanoc.

“Ky nuk është vetëm një skandal, por është edhe një veprim antishqiptar, i orkestruar nga Beogradi me marionetat e tyre në Bujanoc që nuk e dëshirojnë bashkëjetesën në këtë komunë, e ku po tmerrohen nga dëshmorët tanë të cilët edhe pas 24 vjetëve nga flijimi i tyre, nuk po munden ta pranojnë realitetin për lirinë e vendit tonë”.

“Gjaku i tyre do të përkujtohet përjetë. Lavdi për Komandant Lleshin”, ka thënë Musliu.