U akuzua për vrasje të rëndë, i pandehuri thotë se nga frika veproi të mbrojë vetën

I akuzuari për vrasje të rëndë, Kemal Mustafa është deklaruar i pafajshëm dhe ka thënë se nga frika ka vepruar të mbrojë veten.

Këtë deklarim, Mustafa që akuzohet për vrasjen e S.M., e ka bërë të enjten në Gjykatën Themelore në Mitrovicë, në seancën e shqyrtimit fillestar ku është lexuar aktakuza nga prokurorja Fetije Bajrami, raporton “Betimi për Drejtësi”.

“Jo nuk e pranoj që jam fajtor. Unë e kam bërë për me mbrojtë veten sepse në atë moment jam tutë”, deklaroi i akuzuari Mustafa.

Mustafa akuzohet se ka therur me thikë 33 herë viktimën S.M pasi sipas aktakuzës ky i fundit e kishte goditur me grusht, duke i kërkuar marrëdhënie seksuale në kundërshtim me dëshirën e tij.

Pasi i akuzuari u deklarua i pafajshëm, gjykatësi Fatos Sejdijaj e njoftoi se në afat prej 15 ditësh ka të drejtë të paraqes kundërshtimin e provave të caktuara në aktakuzë apo kërkesë për hedhjen e aktakuzës.

Ndersa, në seancën e sotme të shqyrtimit fillestar prezent ishin prokurorja Fetije Bajrami, i akuzuari Kemal Mustafa dhe mbrojtësi i tij Rexhep Kaçaniku, e dëmtuara R.S.M, dhe mbrojtësi i viktimave Isa Aruçi.